Deputetja Duda Balje ka thënë që nuk e ka besuar kur e ka dëgjuar shefen e Grupit Parlamentar të Lëvizjes Vetëvendosje, Mimoza Kusari-Lilën, duke folur në telefon me zyrtarin e Listës Serbe, Slavko Simic.
Kjo për arsye që sipas saj dihen qëndrimet radikale që partia në pushtet i ka pasur karshi LS-së.
“Nuk besova sepse Vetëvendosje ka pasur një mendim shumë radikal edhe Vetëvendosje nuk ka bashkëpunu me Listën serbe prej fillimit, pra prej momentit kur e ka formuar qeverinë në këtë mandat, edhe nuk e prita”, ka thënë Balje për Edicionin Special të Klan Kosovës.
“Na krejt e dimë se shumë politikanë kanë kontaktuar edhe me z. Slavkon, edhe me z. Milanin, por nuk e prita prej Mimozës ose prej dikujt tjetër prej Vetëvendosjes”.
Sidoqoftë, Balje tha që politikën e sheh si art të bisedimit, dhe mendon që kryeministri Albin Kurti ka gabuar kur që nga fillimi “e ka amputuar Listën Serbe”.
