Didier Drogba i ka gozhduar pronarët e rinj të Chelseat, Todd Boehly dhe Clearlake Capital, duke i akuzuar se u mungon klasi dhe duke thënë se klubi është bërë i panjohur qëkur u shit nga Roman Abramovichi vitin e kaluar.
Drogba, i cili e shënoi penalltinë fituese kundër Bayern Munich në finalen e Ligës së Kampionëve më 2012, i bëri të qarta pakënaqësitë e tij para se Chelsea të rrëzohej nga Liga e Kampionëve pas humbjes 2:0 nga Real Madridi në ndeshjen e kthimit çerekfinale të martën.
Ish-sulmuesi i Bregut të Fildishtë po fliste si analist për këtë ndeshje për Canal+ dhe komentet e tij për ndryshimet e mëdha në klubi lidheshin me largimin e figurave kyçe nga udhëheqësia e kaluar në Stamford Bridge.
“E njihja këtë klub si një klub që kishte klas gjatë epokës së Abramovichit, por sot i mungon klasi”, tha Drogba.
“Është shumë e vështirë për mua ta shoh sesi ata i kanë larguar disa njerez të caktuar. Ata duhet t’iu kthehen parimeve dhe vlerave që kishin. Unë nuk po e njoh më klubin tim”, shtoi ai.
Chelsea mori një drejtim të ri pas largimit të Abramovichit, pasi Bruce Buck, Marina Granovskaia, Petr Cech dhe zyrtarë të tjerë me ndikim u larguan në verë.
Lampard, i cili i ka humbur katër ndeshjet e tij të para që prej se u emëruar trajner i përkohshëm këtë muaj, nuk deshi t’i përgjigjej komenteve të Drogbas.
