Reperi i njohur, Don Xhoni përveç hiteve të shumta ai nuk i lë anash as bamirësitë për personat në nevojë.
Rap-artisti nga Drenica në këtë muaj të shenjtë të Ramazanit ka vendosur që të dhurojë donacion për ndërtimin e një shtëpie të re për një familje.
Këtë donacion, reperi vendosi që ta bënte përmes shoqatës së bamirësisë “Jetimat e Ballkanit”.
Lajmin e bëri të ditur humanisti Halil Kastrati përmes një postimi në llogarinë e tij në Instagram, ku e falenderoi reperin për donacionin e dhuruar.
“Faleminderit shumë Don Xhon. Përmes shoqatës tonë po e gëzon një familje me shtëpi të re. Për Iftar sot te shoqata jonë ishte këngëtari Don Xhoni i cili dhuroi donacion për ndërtimin e një shtëpi për një familje nevojtare. Zoti e shpërbleftë”, ka shkruar Kastrati.
E më pas ka reaguar edhe reperi Don Xhon në postimin e tij social në Instagram ku ka thënë se e falënderon Zotin për këtë arritje.
“E falënderoj Zotin që në këtë moshë na ka mundësu me i dal krah ma s’pari vetit, tani familjes e shoqnisë edhe na ka mundësu me ndihmu dikon”, ka shkruar reperi, përcjell Gazeta Papirus.
