Nxënësit e shkollave të kryeqytetit kanë krijuar punime të ndryshme dhe kanë shkruar letra për ish-krerët e Ushtrisë Çlirimtare të Kosovës, të cilët ndodhen në Qendrën e Paraburgimit të Dhomave të Specializuara në Hagë, raporton Gazeta Sinjali.
Përmes një postimi në rrjetin social Facebook, drejtoresha e Arsimit në Komunën e Prishtinës, Besianë Musmurati ka bërë me dije se punimet e fëmijëve janë shpërndarë në Organizatën e Veteranëve të Luftës së UÇK-së, e më pas disa prej tyre do dërgohen te ish-krerët në Hagë.
“Pas ligjeratave të ushtarëve të UÇK-së në disa prej shkollave të Prishtinës, fëmijët bënë punime të ndryshme që i shpërndamë në OVL të UÇK-së. Disa prej tyre po i dërgojmë tek liderët e UÇK-së që po mbahen në Hagë”, shkroi Musmurati, teksa ka ndarë edhe disa nga letrat e fëmijëve.
““Mrekullive të botës duhet ti shtohet edhe lufta çlirimtare e UÇK-së” shkruan Leka nga shkolla Naim Frashëri. “Unë ende kam besim te njerëzimi sepse ende kam besim tek ju. Na keni treguar herë pas here se ne mund t’ju besojmë. Andaj, ju jeni heronjtë tanë!” thotë Erza, e cila ka lindur në vitin që është shpallë Pavarësia. “Ndoshta sot je me thinja, por ne do të kujtojmë gjithmonë për zgjuarsinë, trimërinë dhe sakrificën që e ke bërë për fëmijët e Kosovës” thotë letra tjetër”, thuhet më tej në postimin e drejtoreshës së Arsimit.
