Ish-drejtori i FBI-së, James Comey, është intervistuar nga Shërbimi Sekret i SHBA-së, pasi ai ndau e më pas fshiu një postim në rrjetet sociale që republikanët pretendonin se ishte një nxitje për dhunë kundër presidentit amerikan Donald Trump.
Comey mori pjesë vullnetarisht në marrjen në pyetje për rreth një orë në selinë e agjencisë së zbatimit të ligjit në Uashington DC dhe nuk u mbajt në paraburgim, shkruan BBC, transmeton Gazeta Express.
Kjo vjen një ditë pasi ai postoi në Instagram një foto me guaska deti që shkruanin numrat “8647”.
Numri 86 është një term zhargon, përkufizimet e të cilit përfshijnë “të refuzosh” ose “të heqësh qafe”, megjithatë, kohët e fundit është përdorur si një term që do të thotë “vras”. Trump është presidenti i 47-të i SHBA-së.
Trump tha më herët gjatë një interviste me Fox Neës se Comey, të cilin e shkarkoi nga posti i drejtorit të FBI-së në vitin 2017, po bënte thirrje që ai të vritej.
“Ai e dinte saktësisht se çfarë do të thoshte kjo”, tha Trump, i cili i mbijetoi dy tentativave për jetën e tij vitin e kaluar.
“Një fëmijë e di se çfarë do të thoshte”.
“Nëse ju jeni drejtori i FBI-së dhe nuk e dini se çfarë do të thoshte, kjo do të thotë vrasje. Dhe kjo thuhet me zë të lartë dhe qartë”.
Trump tha se çdo vendim nëse do të ngriheshin akuza kundër Comey do të varet nga Prokurori i Përgjithshëm Pam Bondi.
Comey postoi foton e guaskës të enjten dhe më pas e fshiu atë mes zhurmës konservatore.
Ai shkroi në një mesazh vijues në Instagram se i kishte parë guacat gjatë një shëtitjeje në plazh, “që unë supozova se ishin një mesazh politik”.
“Unë nuk e kuptova që disa njerëz i lidhin këto shifra me dhunën. Nuk më ka shkuar kurrë në mendje, por unë e kundërshtoj dhunën e çdo lloji, kështu që e hoqa postin”.
Sekretarja e Sigurisë Kombëtare Kristi Noem tha në X të premten në mbrëmje se Shërbimi Sekret kishte “intervistuar ish-drejtorin e turpëruar të FBI Comey në lidhje me një postim në mediat sociale që bënte thirrje për vrasjen e Presidentit Trump”.
