Arsenal dhe Tottenham do të udhëtojnë këtë verë në Hong Kong për të luajtur derbin e parë të Londrës së Veriut jashtë Mbretërisë së Bashkuar.
Rivalët e mëdhenj do të përballen jashtë vendit si pjesë e përgatitjeve parasezonale për sezonin 2025/26.
Ndeshja do të zhvillohet më 31 korrik në orën 11:30 të mëngjesit sipas kohës së Mbretërisë së Bashkuar dhe do të luhet në stadiumin e ri Kai Tak, i cili ka një kapacitet prej 50,000 vendesh.
Ky impiant u hap këtë muaj dhe është vendndodhja më e re ikonike për sportin dhe argëtimin në qytet.
Arsenal e ka mposhtur Tottenhamin në të dyja përballjet e këtij sezoni.
“Topçinjtë” fituan 1-0 në shtator në stadiumin e Tottenham Hotspur përpara se të triumfonin 2-1 në Emirates në janar.
Drejtori menaxhues i Arsenalit, Richard Garlick, tha:
“Të gjithë te Arsenali jemi të emocionuar që do të vizitojmë Hong Kongun në korrik. Është fantastike të rikthehemi me ekipin tonë të parë pas 13 vitesh dhe të kemi mundësinë të takohemi me shumë prej tifozëve tanë të mrekullueshëm në rajon”.
“Përveç stërvitjes intensive dhe zhvillimit të ndeshjes, mezi presim të lidhemi me mbështetësit tanë në këtë pjesë të bukur të botës.
“Të luajmë kundër Tottenhamit në stadiumin e ri madhështor Kai Tak do të jetë një eksperiencë e shkëlqyer si për skuadrat ashtu edhe për tifozët dhe një pjesë shumë e rëndësishme e përgatitjeve tona parasezonale përpara sezonit të ri.”
Shefi i të ardhurave te Tottenham, Ryan Norys, tha:
“Ka pak ngjarje më të mëdha në futbollin anglez sesa derbi i Londrës së Veriut dhe ta luajmë këtë përballje në Hong Kong do të jetë një moment i madh për bazën tonë të pasionuar të tifozëve në Azi, si dhe një përgatitje ideale për ekipin përpara sezonit të ri”.
“Siç është traditë në turnetë tanë, klubi do të përfshihet në shumë më tepër sesa vetëm ndeshja kur të vizitojmë, duke mbështetur kauza bamirëse, duke festuar kulturën vendase, duke organizuar klinika futbolli për të rinjtë dhe duke u angazhuar me tifozët dhe partnerët tanë. Mezi presim të vizitojmë përsëri një vend kaq të bukur.”
Kjo ndeshje do të jetë një nga përballjet e fundit parasezonale përpara fillimit të sezonit të ri të Premier League, i cili nis në fundjavën e 16 gushtit.
