Një qytetar me inicialet L.Rr. ka paditur Qeverinë e Kosovës për shkak se gjatë vozitjes kishte dëmtuar veturën, duke rënë në një gropë të një fshati të Skenderajt. Ai pretendon se për dëmin e shkaktuar përgjegjësia i takon Qeverisë për mosmirëmbajtjes së rrugës dhe për këtë po kërkon 1 mijë e 300 euro kompensim.
Lidhur me këtë rast të mërkurën, në Gjykatën Themelore të Prishtinës, ishte paraparë të mbahej seanca, mirëpo e njëjta ka dështuar në mungesë të ekspertit të komunikacionit Sejdi Berisha.
Mungesën e ekspertit Berisha e ka konstatuar gjykatësi Hysni Ismaili, i cili ka njoftuar se nga fletëdërgesa rezulton se i njëjti nuk është ftuar në mënyrë të rregullt për këtë seancë, raporton “Betimi për Drejtësi”.
Po ashtu gjykatësi Ismaili ka shtuar se zyra e ka telefonuar ekspertin, mirëpo i njëjti është përgjigjur se nuk ka pranuar ftesë për seancë dhe për sot nuk e ka të mundur të prezantojë në seancë shkaku i angazhimeve të tij.
Përfaqësuesja e Qeverisë, Nexhmije Karaqa, ka deklaruar se edhe më tutje qëndrojnë pranë propozimit që eksperti i komunikacionit të prezantojë në seancë për të sqaruar ekspertizën.
Në këto rrethana gjykatësi Ismaili ka konstatuar se nuk janë plotësuar kushtet ligjore për mbajtjen e seancës së shqyrtimit kryesor, andaj, vazhdimi i seancës do të caktohet për datën 2 maj 2023.
Më 18 dhjetor 2020 paditësi ka bërë zgjerimin e padisë në aspektin subjektiv, ashtu që si palë e paditur të jenë Qeveria e Republikës së Kosovës dhe operatori ekonomik “Alko Impex”.
Ndryshe, sipas padisë së 22 prillit 2015, L.Rr. ka ushtruar padi ndaj Qeverisë së Republikës së Kosovës, pasi që më 11 maj 2013 në Skenderaj në fshatin Terstenik paditësi ka qenë duke e drejtuar veturën e tij kur papritmas ka rënë në një gropë e cila ka qenë e padukshme në atë kohë të muzgut, çka ka rezultuar në dëmtimin e veturës së tij, ndërsa ai ka përjetuar frikë dhe shqetësim të theksuar.
Sipas padisë, paditësi konsideron se përgjegjësia për dëmin e shkaktuar i takon Qeverisë së Kosovës, për shkak të gjendjes së rrugës së prishur, andaj po kërkon nga gjykata ta detyrojë të paditurën që t’ia kompensojë dëmin material në shumën prej 1 mijë e 300 eurove.
Ndërkaq, për të paditurin e dytë, paditësi konsideron se përgjegjësia për dëmin e shkaktuar i takon edhe operatorit ekonomik “Alko Impex”, ngase sipas padisë kjo kompani ka qenë e kontraktuar nga Qeveria, gjegjësisht Ministria e Infrastrukturës për mirëmbajtjes së rrugës së lartcekur.
