KSW, organizata polake, ka konfirmuar se një ndeshje mes dy prej meshkujve më të fortë në botë do të zhvillohet në një event në PreZero Arena në Gliwice më 26 prill. Mariusz Pudzianowski dhe Eddie Hall do të përballen në KSW 105 në një meç të faturuar si “Lufta më e fortë në botë”.
Pudzianowski është një sportist i fortë polak që ka fituar pesë herë në karrierën e tij titullin e “Njeriut më të Fortë në Botë”. Çmimin e tij të parë e fitoi në vitin 2002, dhe vazhdoi dominimin e tij në vitet në vijim, duke fituar tituj në 2003, 2005, 2007 dhe 2008, rasporton Telegrafi.
Ai e filloi karrierën e tij MMA në vitin 2009, dhe deri më tani ka arritur 17 fitore, nëntë humbje, dhe një luftë ka përfunduar si “pa fitues”. Dy vjet më parë, ai ishte titullar i ngjarjes KSW 51 të mbajtur në Zagreb, ku mundi boshnjakun, Erk Jun.
48-vjeçari polak ka pësuar dy humbje pas pesë fitoreve radhazi. Ai ishte i fundit në kafaz në qershor 2023, kur u mposht nga Artur Szpilka me nokaut teknik. Para kësaj, ai humbi edhe ndaj një prej legjendave më të mëdha të KSW-së, Mamed Khalidov.
Pudzianowski do të ndeshet me Eddie “The Beast” Hall, anglezi 37-vjeçar dhe fitues i titullit “Njeriu më i fortë në botë 2017”. Ai njihet më së shumti për vendosjen e rekordit botëror në ngritjen e peshës 500 kilogramë dhe ky do të jetë debutimi i tij zyrtar në MMA.
Edhe pse rregullat nuk janë nxjerrë ende, Hall ka një përvojë në sportet luftarake. Në qershor 2024, ai luftoi në një ndeshje një-në-një, duke mposhtur influencuesit, vëllezërit Neffati, Jamil dhe Jamel. Në mars 2022, ai luftoi një ndeshje boksi me gjashtë raunde kundër Thor Bjornsson, i njohur si “The Mountain” nga “Game of Thrones” dhe humbi me vendim unanim.
Përveç kësaj përplasjeje spektakolare të peshave të rënda, KSW 105 përmban edhe dy ndeshje të tjera kampionate: Adrian Bartosinski do të mbrojë titullin e tij në peshë të lehtë kundër Andrzej Grzebyk, ndërsa Rafal Haratyk, kampioni i peshave të rënda, do të përballet me Ibragim Chuzhigaev.
