Drejtori i Agjencisë për Efiçiencë të Energjisë, Arsim Kuliqi, është arrestuar të premten nën dyshimin për keqpërdorim të detyrës, lidhur me realizimin e disa projekteve në Burgun e Dubravës, në vlerë afro 200 mijë euro, ka njoftuar Policia e Kosovës.
Sipas njoftimit nga Policia, bëhet fjalë për kontrata mbi projekte që tashmë ishin të realizuara më herët.
“I dyshuari në cilësi të drejtorit të Agjencisë së Kosovës për Efiçiencë të Energjisë, ka nënshkruar kontratë rreth realizimi të disa projekteve në Burgun e Dubravës me një kompani në vlerë prej 199,500.00 €. Dyshohet se projektet në Burgun e Dubravës ishin tashmë të realizuara në vitet 2016-2018, (në Pavionin 4, vlera 271,466.66 €- realizuar në vitin 2016-2018, në Pavionin 6, vlera 233,309.00 € – realizuar në vitin 2016-2018 dhe ndriçimin e perimetrit të jashtëm të Burgut të Dubravës, Faza I, në vlerë 15,240.00 €, Faza II në vlerë 18,675.00 € dhe faza V në vlerë 20,000.00 € – realizuar në vitin 2016-2018). Vlen te ceket se në vitin 2021 ndaj personit të njëjtë ishte iniciuar një rast tjetër nga policia”, thuhet në njoftim të Policisë
Kuliqi dyshohet për “keqpërdorim të pozitës apo autoritetit zyrtar”. Pas intervistimit, rasti ka shkuar në procedurë të rregullt.
