Kryeministri i Kosovës, Albin Kurti, ka thënë se nuk mund të ndërhyjë në çështjen e gjobës së shqiptuar nga Agjencia për Informim dhe Privatësi (AIP) ndaj Partisë Socialdemokrate.
PSD-ja është gjobitur me 20 mijë euro nga AIP për shkelje të të dhënave personale, për shkak të publikimit të numrave personalë të qytetarëve që ishin nënshkruar në një peticion kundër Asociacionit të Komunave me shumicë Serbe.
Në një intervistë për Radio Kosovën të premten, kryeministri ka thënë se qeveria nuk është e përfshirë në gjobën e shqiptuar ndaj PSD-së së Dardan Molliqajt, dikur kolegut të tij në Lëvizjen Vetëvendosje.
“Ka shumë që janë gjobitur nga i njëjti institucion. Këtu s’ka çka të bëjë Qeveria…Këtu nuk ka shokë, por bëhet fjalë për institucione të pavarura”, tha Kurti.
Në çështjen e gjobitjes së PSD-së, Albin Kurti tha se “ne aty nuk mund të ndërhyjmë” sepse në shkurt të vitit 2021 “ne kemi fituar vetëm në një shtyllë të pushtetit” dhe se “ai agjencion është jashtë domenit të ekzekutivit”.
“Në Kuvendin e Kosovës nuk jemi vetëm ne, aty është edhe opozita”, tha ai.
Në fillim të muajit mars, PSD-ja i vendosi në oborrin e Qeverisë 205.000 peticionet e nënshkruara në vitin 2015 për kundërshtimin e Asociacionit të komunave serbe, duke akuzuar kryeministrin Albin Kurti, se i ka “shkelur” këto nënshkrime.
