Vrasja e Policit të Kosovës Afrim Bunjaku më 24 shtator të 2023-ës në Banjskë të Zveçanit tronditi vendin dhe ktheu vëmendjen e të gjithëve në fshatin e 400 banorëve.
Ende pa u zbardhur rrethanat e shtënies në uniformën shtetërore të Kosovës, dikush pretendonte se dinte se çfarë ndodhi.
Ishte pikërisht i akuzuari për spiunazh, ish-polici i Kosovës, Muharrem Qerimi.
Në aktakuzën 55-faqeshe të Prokurorisë Speciale të cilën e ka siguruar KIKS Kosova, gjendet dëshmia e një polici të Kibernetikës (emër i njohur për redaksinë) me të cilin Qerimi kishte pasur komunikime të vazhdueshme, raporton Klankosova.tv.
Në deklaratën e tij, ky polic pohon se i akuzuari për spiunazh e kishte telefonuar ditën kur ndodhi sulmi në Banjskë, me pretendimin se i dinte prapaskenat e rastit.
Këto informacione, Qerimi i kishte thënë se i ka pranuar nga dy të burgosur, njërin prej të cilëve e ka vëlla.
Mirëpo, informacionet e Qerimit, polici thotë se nuk i kishte marrë për bazë, sepse pohonte se ato nuk ishin relavante.
E një ditë pas sulmit në Banjskë, më 25 shtator të 2023-ës, i dyshuari tjetër për spiunazh, Bedri Shabani, realizoi një bisedë telefonike, por ky me Sërgjan Rosiqin, zyrtarin e BIA-s serbe.
Në këtë telefonatë, përgjimi i të cilës u publikua në portalin The Geo Post, dëgjohet Shabani i cili e pyet agjentin e BIA-s nëse i ka parë filmat që ndodhën dje, që mendohet se i referohet sulmit në Banjskë.
E më pas, Shabani kërkon ndihmë prej zyrtarit të BIA-s për të ndezur një punë, që më pas ky me njerëzit e tij t’i shtojnë benzinë, me qëllim që të nxisin të dyja anët, duke e krahasuar me situatën në Banjskë.
Shabani dhe Qerimi ndodhen në paraburgim nga 5 qershori i 2024-ës kur u arrestuan nën dyshimin për spiunazh.
Aktakuza ndaj tyre u ngrit më 19 shkurt të 2025-ës dhe përmes saj Prokuroria Speciale po i akuzon se kanë spiunuar te Shërbimi i Inteligjencës dhe Sigurisë Serbe, duke e rrezikuar rendin juridik e kushtetues të Republikës së Kosovës, si dhe sigurinë e qytetarëve të saj.
Vepra e spiunazhit, sipas legjislacionit në fuqi, sanksionohet nga 5 deri në 12 vjet burgim. /Klankosova.tv
