Nënkryetarja e PDK-së, Vlora Çitaku tha në një intervistë për T7 se “nuk duhet të rrezikohet e ardhmja e Kosovës për një grusht votash”, ndërkohë që partia më e madhe opozitare po e mban një mbledhje të Këshillit Drejtues, pasi Bashkimi Europian konfirmoi masat e para ndëshkuese ndaj Kosovës për mosshtensionimin e situatës në veri.
Çitaku tha se në mbledhjen e PDK-së “ka një debat shumë të gjallë” dhe “ka shqetësim” për gjendjen në të cilën ndodhet vendi. Ajo tha se “PDK-ja do të përdorë të gjitha instrumentet politike, parlamentare dhe joparlamentare për ta ndaluar këtë trajektore”.
Ajo tha se PDK-ja po diskuton një sërë propozimesh se çfarë duhet të ndërmarrë në këtë situatë.
“Nuk mundemi të simulojmë normalitet në një situatë tërësisht jonormale”, tha Çitaku.
Nënkryetarja e PDK-së pyeti se pse Qeveria nuk foli për masat, deri kur nga Brukseli ia konfirmuan Gazetës Express se për to Ekzekutivi ishte njoftuar para disa ditësh.
“Si është e mundur që një gjë kaq e madhe, kaq jetike të mbahet e fshehur nga ana e Qeverisë”, tha Çiraku.
Ajo tha se “këtu nuk po bëhet fjalë më vetëm për moskoordinim”, por edhe për “mosrespekt”.
