Nënkryetarja e Partisë Demokratike të Kosovës, Vlora Çitaku, ka kërkuar veprime konkrete për rikthimin e rendit dhe sigurisë pas vrasjeve të fundit që kanë tronditur vendin.
Ajo shprehu shqetësimin për rritjen e dhunës dhe krimit në Kosovë, duke thënë se çdo mëngjes qytetarët po zgjohen me lajme të rënda që tregojnë për pasigurinë në rritje, përcjell Gazeta Papirus.
“Mbrëmë, në një akt që trondit thellë ndërgjegjen e çdo qytetari, një pjesëtar i Policisë së Kosovës u vra në hyrje të shtëpisë së tij. Një njeri i uniformës, simbol i rendit dhe sigurisë, u bë viktimë në vendin që duhej ta kishte më të shenjtë: në prag të shtëpisë së tij”, ka shkruar Çitaku.
Ajo kritikoi institucionet për mungesën e reagimit dhe paralizimin e qeverisë përballë krimit të organizuar dhe dhunës, duke theksuar se shteti po dështon çdo ditë.
“Nuk ka më kohë për deklarata boshe. Duhet veprim. Duhet përgjegjësi. Duhet të rikthehet shteti. Përndryshe, shumë shpejt, askush nuk do të ndihet i sigurt askund”, përfundoi Çitaku reagimin.
Në 10 ditët e fundit, në Kosovë janë regjistruar pesë vrasje. Dje në mbrëmje, një polic në Kaçanik u vra para banesës së tij.
