Rastet e dhunës në familje janë në rritje çdo ditë e më shumë. Zakonisht viktima janë gratë, të cilat përjetojnë dhunë psikike e fizike jo vetëm nga bashkëshortët, por edhe nga pjesëtarët tjerë të familjes. Kosovarët nuk i ‘kursejnë’ nga dhuna gratë as gjatë ditëve të festive, siç ishte Dita e të Dashuruarve dje, raporton Gazeta Sinjali.
Në Polici mbrëmë kanë përfunduar një çift nga Skenderaj, pasi dyshohet se burri ka sulmuar fizikisht bashkëshorten e tij.
Sinjali mëson se 44-vjeçarja ka denoncuar rastin në organet e rendit, ku ka deklaruar se i shoqi e ka rrahur duke e goditur në trup dhe për këtë ka kërkuar që të marrë edhe tretman mjekësor në Qendrën Kryesore të Mjekësisë Familjare në Skenderaj. Viktima po ashtu ka kërkuar që të pajiset me urdhër mbrojtës, pasi që sipas saj, nuk ndihet e sigurt në praninë e bashkëshortit.
Si rezultat i denoncimit, i dyshuari është shoqëruar në stacion policor ku është intervistuar lidhur me rastin.
Pas përfundimit të procedurave policore, Prokurori i Shtetit ka urdhëruar që i dyshuari të hetohet nën dyshimet për kryerjen e veprës penale ‘Sulm’.
