Tensionet në veriun e vendit nuk kanë të ndalur. Pas shpërthimeve të ditëve të kaluara, një i tillë u regjistrua edhe sonte afër Shkollës Teknike në veri.
Gjithçka filloi me sulmet me bomba ndaj zyrave të KKZ-së katër ditë më parë, me ç’rast për sulm terrorist u arrestua ish-pjesëtari serb i Policisë së Kosovës, Dejan Pantiq.
Arrestimi i Pantiq aktivizoi strukturat kriminale serbe të cilat filluan me barrikadimin e rrugëve gjithandej zonave të banuara me shumicë serbe, gjë kjo që çoi në mbylljen e pikave kufitare në Bërnjak e Jarinje nga Policia e Kosovës.
Kriminelët serbë pas shpërthimeve të shumta e gjuajtjeve me armë, tri ditë më parë plagosën policin Ekrem Neziri, i cili ndodhej në detyrë në fshatin Serbovc, mes Komunës së Zveqanit dhe Leposaviçit.
Për të parë se si është gjendja sonte, prej orës 22:00 “Mitropol” po qëndron në lagjet “Kroi i Vitakut, “Tre rrokaqiejt” Lagjen e Boshnjakëve, e fshatin Çabër në Zubin Potok.
“Mitropol” ka biseduar me banorët shqiptarë të këtyre zonave, shumë prej të cilëve kanë thënë se po vërejnë se serbët po largojnë gratë e fëmijët nga shtëpitë e tyre.
Qytetarët thonë se dyshojnë që këto lëvizje janë të orkestruara dhe se mund të jenë pjesë e ndonjë plani më të madh.
“Serbët po largohen drejt zonave më të thella të veriut”, thonë shqiptarët për “Mitropol”.
Banorët shqiptarë megjithatë janë të vendosur të qendrojnë në shtëpitë e lagjet e tyre dhe ta ruajnë qetësinë.
Forcat e shumta policore, siç shihet edhe në fotografitë e realizuara nga “Mitropol” në terren po vazhdojnë të ofrojnë siguri për banorët e zonave me shumicë shqiptare.
Informatat për lëvizjet e serbëve nuk janë konfirmuar nga burime zyrtare.
