Vajzat dhe gratë po vazhdojnë të jenë viktimat më të shpeshta të dhunës që përjetojnë qoftë nga bashkëshortët apo partnerët e tyre. Kjo dukuri shqetësuese ka marrë përmasa të mëdha kohëve të fundit.
Në mesin e shumë grave ndaj të cilëve është ushtruar dhunë fizike e psikike është edhe një 38-vjeçare nga Deçani, e cila është sulmuar brutalisht nga burri i saj.
Burimet bëjnë me dije se viktima ka kërkuar ndihmën e Policisë, ku ka deklaruar se pas një mosmarrëveshje, i dyshuari ka eskaluar në dhunë fizike ndaj saj duke e goditur me shkop druri.
Si pasojë e dhunës, viktima ka marrë lëndime trupore dhe ka kërkuar ndihmë mjekësore, ndërkohë i dyshuari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka urdhëruar ndalimin e të dyshuarit dhe i njëjti do të hetohet nën dyshimet për kryerjen e veprës penale ‘Dhuna në familje’.
