Nënkryetari i PDK-së, Ramë Buja, ka thënë se para një Asociacioni të Komunave serbe me përgjegjësi ekzekutive është për shkëmbim të territoreve me Serbinë.
Buja sqaroi qëndrimin e tij rreth kësaj teme që sipas tij e kishte përmendur edhe në vitin 2001.
“Tri komunat e veriut nëse do të kenë kompetenca ekzekutive, Kosovën kurrë nuk do ta lënë të qetë. Është telashja e kufirit pasi që Çagllavica, Graçanica e këto tjera nuk përbëjnë rrezik. Mundësia e lidhjes së tyre fizikisht me Serbinë është telashe jo e vogël”, ka thënë Buja për ATV.
“Unë në vitin 2001 e kam shtruar çështjen e shkëmbimit të territorit, ku edhe atëherë ka patur reagime dhe këtë temë e kam biseduar edhe me zyrtarë të Departamentit të Shtetit Amerikan”, tha ai.
“Para Asociacionit me kompetenca ekzekutive jam për shkëmbim territoresh, që Lugina t’i bashkohet Kosovës dhe veriu i Kosovës t’i bashkohet Serbisë”, tha ndër të tjera Buja.
