Që katër vjet tokën ruse nuk e shkeli asnjë udhëheqës i lartë i Mbretërisë së Bashkuar.
Por, kriza në Ukrainë i dha fund bojkotit britanik të vizitave në Moskë. Këtu, të enjten, erdhi sekretarja e Jashtme, Liz Truss, që pas vendosjes së një kurore në varrin e ushtarit të panjohur, u prit nga homologu rus, Sergej Lavrov.
Me gjasë, muhabeti brenda ishte i nxehtë, pasi të dy nuk e kursyen njëri-tjetrin as para medieve.
Truss kërkoi që Moska të heqë trupat përreth kufirit ukrainas dhe të zgjidhë krizën me diplomaci.
“Unë nuk mund të shoh ndonjë arsye tjetër për të pasur 100,000 trupa të stacionuara në kufirin ukrainas, përveç kërcënimit të Ukrainës,” deklaroi sekretarja britanike, Liz Truss.
Lavrov e quajti të papranueshme kërkesën e britanikes dhe menjëherë ia përmendi shtimin e trupave të mbretërisë dhe NATO-s në Evropën Lindore.
“Ne shpjeguam në detaje se Forcat e Armatosura Ruse, të cilat ministrja i përmendi dhe të cilat janë duke shkaktuar shqetësim në Londër, ndodhen në territorin e tyre,” tha Lavrov.
Rusi nuk u ndal me kaq. Ai i tha në sy Trussit se janë pikërisht veprimet e Britanisë ato që po shkaktojnë trazira në Ukrainë.
Britanikja nuk komentoi për këtë, por guxoi të thotë se mund të ketë pasoja të rënda për Rusinë nëse e sulmon Ukrainën.
Kundërshtimi i rreptë që iu bë midis shtëpisë së tij qeveritare në Moskë e nervozoi Lavrovin.
Ky nuk u tregua nikoqiri më i mirë, pasi u largua nga konferenca pa e përshëndetur mysafiren.
