Josep Borrell, përfaqësues i Lartë për politikë të Jashtme dhe të Sigurisë nga Bashkimi Europian, ka komentuar situatën e tensionuar në veri të Kosovës, ku ndër tjerash ka thënë se, aktet e dhunës janë të papranueshme, shkruan Gazeta Metro.
Po ashtu, ai ka deklaruar se BE’ja dënon fuqishëm dhunën në veri të Kosovës, e cila është parë ditëve të fundit.
“Dua të them se BE-ja e dënon fuqishëm dhunën në veri të Kosovës që kemi parë ditëve të fundit. Aktet e dhunës ndaj qytetarëve, mediave, forcave të rendit dhe KFOR-it janë të papranueshme. Ne si BE qëndrojmë prapa NATO-s dhe KFOR-it në përmbushjen e mandatit në interes të paqes dhe stabilitetit në Kosovë”, tha Borrell.
Ai tha se mëngjesin e sotëm ka biseduar me kryeministrin e Kosovës, Albin Kurti, teksa mbrëmjen e së hënës ka zhvilluar një bisedë edhe me presidentin e Serbisë, Aleksadar Vuçiq, dhe i ka ftuar që të “qetësojnë menjëherë situatën dhe pa kushte”.
Borrell, ka kërkuar nga Kosova që të pezullojë operacionet policore të lidhura me ndërtesat e komunave në veri të Kosovës.
“Çdo hap tjetër i njëanshëm duhet të shmanget. Si hap i parë, pres nga Kosova të pezullojë operacionet policore të lidhura me ndërtesat e komunave në veri të Kosovës, dhe protestuesit e dhunshëm të ndalen. Ne do të vazhdojmë të jemi të angazhuar me dy liderët” që të ndalen protestat, tha Borrell, shkruan REL.
Borrell po ashtu tha se blloku evropian pret që Kosova dhe Serbia të angazhohen në dialog dhe të hapin rrugën për zbatimin e Marrëveshjes drejt normalizimit të raporteve.
“Po punoj që të organizoj një takim urgjent të nivelit të lartë”, tha Borrell.
