Sekretari amerikan i Shtetit, Antony Blinken, thotë se presidenti Joe Biden i ka dhënë leje Ukrainës t’i përdorë armët amerikane për të kryer sulme brenda Rusisë, por vetëm për qëllime të kufizuara për ta mbrojtur Harkivin.
Duke folur në Pragë të premten në një takim joformal të ministrave të Jashtëm të vendeve anëtare të NATO-s, Blinken tha se Ukraina i kishte kërkuar Uashingtonit leje për t’i përdorur armët amerikane për sulme brenda Rusisë, pasi po përpiqet t’i mposhtë trupat ruse që e nisën pushtimin e plotë të Ukrainës në shkurt 2022.
“Në javët e fundit, Ukraina erdhi dhe na pyeti për autorizim për përdorimin e armëve me të cilat ne po e furnizojmë atë për t’u mbrojtur kundër këtij agresioni, përfshirë kundër forcave ruse që po mblidhen në pjesën ruse të kufirit nga ku po e sulmojnë Ukrainën”, tha Blinken.
“Kjo iu kërkua presidentit, dhe siç keni dëgjuar, ai e ka miratuar përdorimin e armëve për atë qëllim”, shtoi ai.
Ndërsa një zyrtar i lartë rus ka thënë se mund të hyjë në luftë me NATO-n nëse Ukraina godet brenda Rusisë me armë amerikane.
Të enjten, presidenti Joe Biden hoqi pjesërisht kufizimet se si Ukraina mund të përdorë furnizimet ushtarake të dërguara nga ShBA-ja, raporton SkyNews.
Si përgjigje, zyrtari i lartë rus i sigurisë, Dmitry Medvedev lëshoi një sërë paralajmërimesh për Perëndimin.
“Rusia i konsideron të gjitha armët me rreze të gjatë të përdorura nga Ukraina si tashmë të kontrolluara drejtpërdrejt nga ushtarakët e vendeve të NATO-s. Kjo nuk është ndihmë ushtarake, kjo është pjesëmarrje në një luftë kundër nesh”, tha Medvedev.
“Dhe veprime të tilla mund të bëhen një casus belli [një akt që provokon një luftë].”
