Profesori universitar Blerim Latifi ka postuar në rrjetin social Facebook një histori të betejës së fundit të Shaban Polluzhës në fshatin Terstenik.Latifi ka treguar se si një komandant partizan kishte ardhur me një mision të qartë, thyerjen e qëndresës së Polluzhës dhe grupit të tij.
“Dueli midis dy komandantëve në ditën fatale”, e titullon Latifi.
“Qysh në vjeshtën e vitit 1944 Petar Brajoviqi, me urdhërin e Titos, ishte bërë komandanti suprem i brigadave partizane. Ai ishte graduar në gjeneral kolonel. Në mëngjesin e 21 shkurtit 1945 ai morri lajmin e shumëpritur: Shaban Polluzha, tani i mbetur me vetëm rreth 40 luftëtarë, ishte rrethuar në tri kulla prej guri në fshatin Terstenik. Në orët e pasditës i erdhën lajme të tjera: rezistenca e të rrethuarve nuk po thyhej dot. Terreni ishte krejtësisht i zhveshur dhe partizanët nuk u ofroheshin dot kullave. I zemëruar Brajoviqi u ngrit në këmbë dhe u tha vartësve të tij: Do të shkoj unë personalisht për ta zanë të gjallë atë plak kokëfortë. Morri njësinë e tij dhe brenda dy orësh u shfaq në fushën e betejës. Pjesëmarrës në shumë beteja, Petar Brajoviqi e mbivlerësonte veten. Ai zgjodhi njerëzit më trima nga radhët e partizanëve dhe u sul në drejtim të kullave ku po mbrohej plaku kokëfortë, siç e quante Shaban Polluzhën. Ndërkaq, topi që ishte në prapavijë, godiste papushim kullat që Brajoviqit t’i mundësoj afrimi tek muret e tyre. Kur tanimë ishin pranë cakut dhe Brajoviqi po shtinte me automatikun e tij në hyrje të njërës prej kullave, nga brenda saj u dëgjua bresheria e një mitrolozi, i cili ia këputi të dy këmbët, duke e lënë sakat për gjithë jetën, deri në vdekjen e tij në vitin 1991.”, tregoi ai.
Sot është përvjetori i vdekjes së Shaban Polluzhës, luftëtar i cili u angazhua për bashkim kombëtar dhe luftë kundër komunizmit. /Express/
