Ish-kryeministri Sali Berisha zbuloi nga foltorja e Kuvendit shkakun e mos hapjes së xhamisë së Namazgjasë për festën e Fiter Bajramit sikundër ishte paralajmëruar.
Ai akuzoi kryeministrin Rama se me porosi të Erdogan po i bën presion kreut të Komitetit Mysliman për të dhënë dorëheqjen
Berisha tha se sapo PD të vijë në pushtet do ti paguajë Erdogan çdo qindarkë që ka shpenzuar për xhaminë, pasi sipas tij autonomia fetare është më e çmuar se shumë e shumë ndërtesa kulti.
“Besimtarëve myslimanë shqiptarë Edi Rama ja u prishi gëzimin e Bajramit, nuk e hapi xhaminë. Jo vetëm kaq po informohem se ka dërguar njerëz për ti bërë presion kryetarit të Komunitetit Mysliman për të dhënë dorëheqjen sepse sipas këtij këtë kërkon presidenti i Turqisë Erdogan”, tha ai.
Tutje ai vazhdoi duke thënë se është aty për të dënuar qëndrimet e Edi Ramës.
“Unë jam këtu për të dënuar me forcën më të madhe këto qëndrime të Edi Ramës. Asnjë ndërhyrje në autonominë e komuniteteve fetare nuk lejohet. I bëj thirrje Presidentit të Turqisë të sjellë çdo dosje për çdo individ por që të fajësojmë ne njerëz, qytetarë fetarë apo zyrtarë pse janë shkolluar me fondet e Gylenit kur ai ka qenë aleati juaj më i ngushtë kjo nuk mund të ndodhë dhe nuk është absolutisht e drejtë. Është e paimagjinueshme që të ndërhyhet se kush duhet të jetë kryetar i Komunitetit Mysliman. Jam këtu gjithashtu me mesazhin e qartë: Xhaminë, të falenderojmë për ndërtimin, por nesër në pushtet PD do të paguajë çdo qindarkë për ndërtimin e saj. Për ne autonomia e konuniteteve fetare është më e çmuar se shumë e shumë ndërtesa kulti. Edhe njëherë dënoj qëndrimin e Edi Ramës”, u shpreh Berisha.
