Shkruan: Kimete Berisha
Baladë për Pelën e munguar!
- U takua me 10 vajza të shkollës fillore.
Presidentja na njoftoi se e ka zhvilluar një ‘bashkëbisedim’ me to.
Vendosi të ‘bashkëbisedoj’ vetëm me vajzat e Prishtinës, sepse fshatrat ndodhen larg Prishtinës, bashkë me vajzat e fshatit.
Ato vajzat fshatare bile as që kanë qejf të bëhen Presidente.
Bashkëbisedimi realizohet me dikë të barabartë me ty.
Presidentja i ka pyetur vajzat se ‘Çfarë do të bënit sikur ta kishit fatin tim’!
Dhe nuk ka bashkëbiseduar me djem për këtë temë.
Në takim, Presidentja e hapi edhe temën e kukullave!
Kukulla e parë nuk harrohet – tërhoqi vërejtjen Presidentja.
Plotësisht ka të drejtë.
Unë e kam pasur veç një kukull n’jetë, prandaj nuk e harroj kurrë.
Varfëria e ushqen dashurinë – qind për qind po.
Se kur ke shumë kukulla, ti nuk di cilën ta duash, e nuk e do asnjërën – nga pavendosmëria.
Një truproje u dëgjua duke pyetur ‘A thua more Zot pse s’ka kukulla meshkuj’.
Truproja kishte të drejt: Dikush prej nesh është dashur t’i punojë me lesh meshkujt kukulla, m’i thirr me emra, dhe me lu’ me ta, meqenëse ka femra që çuditërisht nuk kanë talent të ‘luajnë’ me meshkujt…
- Presidentja nuk e ka falur asnjë të burgosur. Dikush, e ka zanat nuk fal.
Kur nuk i fal mëkatarët e huaja, paramendoje ti nëse i bën diçka keq kësaj, kjo për një fjalë goje t’jetë n’derë.
Zoti fal – e unë Jo. Ju kujtohet filmi ‘God forgives – I don’t’, me Bad Spancerin e Terens Hillin.
Bad Spenser nuk fal.
- Jemi duke kaluar nëpër kriza të llojllojshme.
Mezi e kaluam panikun e qepëve të reja (që mall e kishe me ju afru dikujt – duman anë e katër anëve), tash jemi duke kaluar në djerësitjen kolektive. - E Albin Kurti është duke kaluar nëpër krizën e Like-ve.
Por, rënien e ‘tyre’ po e përballon me stabilitet shpirtëror.
Sa më shumë po e zhvillon ekonominë shoqërore aq më shumë po përjeton rënie të Like-ve personal.
Gjakderdhje ekonomike!
- Unë mbrëmë e kisha një krizë emocionale, zgjati disa minuta por mua m’u duk 1 vit (sepse shpirti e ka kohën më të gjatë se trupi: personalisht shpirtin e mas me kalendarin islam kurse trupin me kalendarin gregorian), emocionet na kanë lënë mbrapa – dije.
- Edhe Oda Amerikane doli kundër tërheqjes së kursimeve tona.
Gjithmonë kam qenë e vendosur se Oda duhet ta ndryshojë emrin.
Nëse nuk na i japin paret tona, ne do të vuajmë tash, nëse na i japim paret tona do të vuajmë më vonë.
Më mirë ta shtyjmë vuajtjen për më vonë.
Oda nuk po na tregon se ‘cilat pare duhet t’i harxhojmë ne’, paret e kujt?
Ku duhet t’i marrim paret për t’i harxhuar, mbasi që paret tona nuk është e ndershme t’i harxhojmë.
Amerika për vete e ka Biden-in i preokupuar me mirëqenien e amerikanëve: sahat e dakik poston statusa për punësimin e amerikanëve dhe zvogëlimin e papunësisë….
E ne e kemi një Presidentie të tekstilit, që nuk merret me varfërinë e shqiptarëve, por që e ka kapluar paniku i bukurisë.
- Ministri i bujqësisë sot u takua me ambasadoren e Izraelit.
Ambasadorja i tregoi ministrit Peci se si izraelitët sakrifikohen për agrokulturë dhe se si Izraeli është ‘Toka e shegës’.
Në Kosovë, tha Peci, Shega ka marrë formën e njeriut, ka shumë Shega, ama nuk ‘hahen’.
Shega sipas Kur’anit është frut i Parajsës, janë të shijshme, por nuk kanë arritur t’i bindin izraelitët të bëhen muslimanë për hatër të tyre.
Për ushqim duhet të sakrifikohesh, porositi ambasadorja.
Faton Peci u ofrua që të luaj rolin e gogolit (strashillës) për nder të festës së Bukkurimit.
Në fund të takimit, ambasadorja e pyeti Pecin: A është kastraveci frut apo perime? Perime- u përgjigj Peci.
Kastraveci është frut, zotëri!
P.S. Më me respekt e dashuri i ka kënduar Leonard Cohen – Pelës, sesa këngëtarët shqiptarë njeriut.
Vargje nga ‘Ballad Of The Absent Mare’ (Baladë për Pelën e munguar’!
Nuk i ka mbetur askush për ta ndjekur pas
Nuk ka ku të shkojë
Pela ka ikur si vera
Iku si bora
Dhe karkalecët u thyen
Si Zemra e tij me tingullin e tyre
Ndërsa dita futet në gropë
Dhe nata është e gjitha e gabuar. /Gazeta papirus/
