Kryetari i Nismës Socialdemokrate, Fatmir Limaj, muajve të fundit ka qenë subjekt i shpeshtë i spekulimeve për një rikthim të tij në Partinë Demokratike të Kosovës, aty ku shërbeu për shumë vite.
Se Limaj mund të rikthehet “në origjinë” tërthorazi e tha edhe kryetari i Mitrovicës nga radhët e PDK-së, Bedri Hamza.
Në emisionin “Pressing” në T7, Hamza u pyet nëse PDK-ja është e hapur për një rikthim t ëish-ministrit të Infrastrukturës.
Hamza tha se ka bashkëpunuar me Limajn, duke shtuar se PDK-ja është e gatshme të bashkëpunoj.
“Kam bashkëpunuar me të gjithë, po unë çka ka deklaru, ka deklaru që është për një front të përbashkët. Unë mendoj që brenda secilit subjekt politik, posaqërisht brenda PDK-së, kam dëshirë dhe punoj në atë, që të ketë kombinim të gjeneratave, gjinive, profesioneve, njerëz prej të gjitha shtresave, secili e ka vlerën dhe votën e vetë”, – mendon Hamza.
Ish-ministri Financave beson se Fatmir Limaj ka çka të ofroj në PDK.
“Prandaj nuk shoh asnjë shqetësim që një njeri që i ka taku edhe një subjekti politik tjetër, dhe nesër bohet pjesë e strukturave të PDK-së, ka ndrru vizionet ka ndrru qëndrimet edhe është në të drejtën e tij. Mendoj që mundet me dhanë, mendoj që ka çka me dhanë”, – tha Hamza.
Edhe figura tjera në PDK duan rikthimin e Limajt
Përveç kësaj, kohëve të fundit Limaj është parë shpesh edhe me nënkryetarin e Skenderajt, Sami Lushtaku, madje duke publikuar disa herë edhe fotografi së bashku.
Madje, Lushtaku kishte thënë se Fatmir Limaj duhet të kthehet në ish-partinë e tij.
“Limaj i duhet dhe PDK-së, po ashtu i duhet edhe shtetit të Kosovës”,- kishte deklarur prerazi Lushtaku.
Përveç këtyre, edhe ish-nënkryetari i PDK-së, Ramë Buja, ka deklaruar se nuk e beson që mund t’i kufizohet dikujt të kthehet në Partinë Demokratike të Kosovës, qoftë edhe kryetari i Nismës Socialdemokrate, Fatmir Limaj.
Ish-ministri i Arsimit deklaronte se në PDK gjithsesi duhet të vinë edhe figura të tjera.
“Gjithsesi të hapet për të rinjtë dhe që kanë dispononim, të kthehen e të vijnë. Unë kam një parim, që pavarësisht se njerëzit çfarëdo partie janë, unë kur i kam shokë e miq, partitë i futi nën tavolinë kur bisedoj dhe pij kafe me ta”, thoshte ai.
Edhe ish-kandidati për kryetar të Prishtinës nga radhët e PDK-së, Agim Çeku, kishte deklaruar qartazi se një rikthim i Limajt do t’i bënte mirë atij dhe PDK-së, pasi siç thoshte ai, kjo parti është lënduar me shkuarjen ne Hagë të Hashim Thaçit dhe Kadri Veselit.
Buja theksoi se është takuar me ish-ministrin Fatmir Limajn dhjetëra herë dhe me të tjerët që sot nuk i ka parti por i ka pasur bashkëluftëtarë.
“Partitë mund të mbesin vetëm nëse zgjerohen, i bashkëngjiten qoftë nëse e ka emrin Fatmir apo kush e di qysh… Është shumë i rëndësishëm, kishte me qenë mirë edhe për të por edhe për PDK-në”, – thoshte Çeku.
