Në Beograd këtë të mërkure është nënshkruar paketa e re vjetore e asistencës së para-anëtarësimit të Bashkimit Evropian për Serbinë (IPA) me vlerë 162.2 milionë euro, raporton televizioni N1.
Dokumenti është nënshkruar nga ministrja për Integrime Evropiane e Serbisë, Tanja Miscevic, dhe shefi i delegacionit të BE-së në Serbi, Emanuele Zhiofre, në fillim të manifestimit “Java e mundësive të BE-së”.
Komisioneri Evropian për Fqinjësi dhe Negociatat e Zgjerimit, Oliver Varhelji, në një video-mesazh të publikuar para nënshkrimit të marrëveshjes, deklaroi se BE-ja është investitori dhe partneri tregtar më i madh i Serbisë dhe se është e gatshme të vazhdojë të investojë në partneritet dhe bashkëpunim.
“Serbia bëri një zgjedhje strategjike për të qenë pjesë e aleancës së vendeve të forta dhe të begata. BE bëri një zgjedhje strategjike kur filloi procesin e negociatave me Serbinë. Ato negociata do të çojnë në anëtarësimin e plotë të Serbisë në BE dhe unë jam plotësisht i përkushtuar për ta realizuar atë”, tha Varhelji.
Ndërsa ambasadori i BE-së, në Serbi, Emanuele Zhiofre, deklaroi se në kuadër të bashkëpunimit ndërmjet Serbisë dhe BE-së, siç është pakoja e ndihmës e nënshkruar sot, krijohen mundësi që nuk janë vetëm rezultat i bujarisë apo bamirësisë së BE-së, por janë krijuar dhe ekzistojnë sepse Serbia ka bërë një strategji për t’u bërë anëtare e BE-së.
“Ne e dimë se kur ke një mundësi, gjëja më e keqe që mund të ndodh është ta humbësh atë. Ne nuk duam që Serbia dhe qytetarët e saj të humbasin këto mundësi”, tha Zhiofre.
Ai shtoi se BE-ja pret rezultate nga Serbia për të krijuar kushte për reforma që do t’i mundësojnë anëtarësimin e saj në BE.
“Sa i përket BE-së, Serbia është pjesë integrale e Evropës, gjeografikisht, historikisht, kulturalisht dhe ekonomikisht. Misioni i Delegacionit të BE-së është ta bëjë Serbinë një partner edhe më të fortë të BE-së, të bëjë progres progresiv dhe të vazhdueshëm drejt BE-së”, shtoi ai.
Ku shpërndahen mjetet?
Kontributi i BE-së në projektet IPA 2022 në Serbi i cili u nënshkrua, arrin vlerën në 162.2 milionë euro, pjesa më e madhe e të cilave do të ndahet për përshpejtimin e zbatimit të agjendës së gjelbër.
72.8 milionë euro janë caktuar për përmirësimin e infrastrukturës dhe rritjen e kapaciteteve institucionale, mbrojtjen e mjedisit, menaxhimin dhe zbutjen e ndryshimeve klimatike.
Ndërsa 30 milionë euro secila janë caktuar për mbështetjen sektoriale për reformat në drejtësi dhe administratën publike.
15.9 milionë euro janë caktuar për promovimin e qeverisjes së mirë, rritjen e përputhshmërisë me vlerat e bashkimit dhe përafrimin e tyre me rregullat, standardet dhe praktikat e BE-së në fushat përkatëse, për të mbështetur zbatimin e të drejtave themelore të kategorive të cenueshme si personat e zhvendosur brenda vendit dhe të kthyerit nën marrëveshjet e ripranimit.
8.5 milionë euro për rritje gjithëpërfshirëse përmes përmirësimit të shërbimeve sociale, punës dhe arsimit.
Ndryshe, gjatë 15 viteve të fundit, BE-ja ka investuar më shumë se 2.5 miliardë euro në Serbi përmes më shumë se 1500 projekteve.
