Bashkimi Evropian dënon marrëveshjen e Rusisë dhe Bjellorusisë për të lejuar vendosjen e armëve bërthamore ruse në territorin bjellorus, pasi kjo do të çojë në përshkallëzim të mëtejshëm jashtëzakonisht të rrezikshëm.
Kështu thuhet në një deklaratë të lëshuar nga Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell.
“Vendimi bie ndesh me zotimet që Rusia ka marrë në Memorandumin e Budapestit, ku Bjellorusia eliminoi të gjitha armët bërthamore nga territori i saj. Ne i bëjmë thirrje Rusisë që t’u përmbahet këtyre angazhimeve”, thuhet në deklaratë.
Sipas Borrell, regjimi bjellorus është bashkëpunëtor në luftën e paligjshme dhe të paprovokuar të agresionit të Rusisë kundër Ukrainës.
“Ne u bëjmë thirrje autoriteteve bjelloruse që t’i japin fund të menjëhershëm mbështetjes së tyre për luftën e agresionit të Rusisë kundër Ukrainës dhe të anulojnë vendimet që mund të kontribuojnë vetëm në rritjen e tensioneve në rajon dhe të minojnë sovranitetin e Bjellorusisë”, thuhet në deklaratë.
Borrell shtoi se çdo përpjekje për të përshkallëzuar më tej situatën do të përballet me një reagim të fortë dhe të koordinuar.
Më 25 maj, ministri bjellorus i Mbrojtjes Viktor Khrenin dhe ministri rus i mbrojtjes Sergei Shoigu nënshkruan dokumente që lejojnë vendosjen e armëve taktike bërthamore ruse në territorin e Bjellorusisë.
