Bayern Munich ka shënuar një fitore të thellë ndaj Augsburgut, në kuadër të xhiros së 24-të në Bundesliga.
Edhe pse futbollisti me prejardhje nga Kosova, Mërgim Berisha shënoi dygolësh, Bayern fitoi me rezultat 5:3.
Pas vetëm tre minutave lojë, Mërgim Berisha me një driblim fantastik la të shtangur Joao Cancelon për t’i dhënë epërsinë mysafirëve (3′).
Sidoqoftë, gëzimi i Augsburgut zgjati vetëm 12 minuta me Cancelon që barazoi rezultatin pas një harkimi të Leroy Sanes.
Vetëm shtatë minuta më vonë, Benjamin Pavard përmbysi rezultatin me një gol të bukur (19′) – VIDEO.
Pavard vazhdoi me formën fantastike duke u përkujdesur edhe për golin e dytë pas një gabimi në mbrojtje (35′).
Kurse, Leroy Sane u sigurua që Bayerni të shkojë në pushim me epërsinë e tre golave në përfundimin e pjesës së parë (45′).
Augsburg e nisi sërish më mirë pjesën e dytë, duke ngushtuar epërsinë prapë përmes Berishës, i cili këtë herë ishte i saktë nga pika e bardhë (60′).
Sidoqoftë, Bayern Munich vulosi fitoren me anë të Alphonso Davies që u asistua nga Cancelo (74′).
E tëra që arriti të bëjë Augsburgu, ishte goli i tretë në kohën shtesë me anë të Irvin Cardona (90+3′).
Me këtë fitore, Bayern Munich mban kreun me 52 pikë, derisa Augsburg renditët në pozitën e 13-të me 27 sosh.
Sa i përket Berishës, ishte goli i tetë në Bundesliga dhe në ditët në vijim do të mësohet vendimi i tij përfundimtar se cilën kombëtare do ta përfaqësojë.
