Barcelona ka shënuar fitore në “El Clasico” ndaj Real Madridit për ta rritur distancën në 12 pikë në kreun e La Ligas.
Derbi i rivalëve të përbetuar ishte tejet i zjarrtë nga minuta e parë, me blaugranasit që fituan në “Camp Nou” me rezultat të ngushtë 2:1.
Pas vetëm nëntë minutave lojë, Real Madridi kaloi në epërsi pas një autogoli të Ronald Araujos, i cili në përpjekje për ta larguar topin e la të shtangur Ter Stegenin (9′).
Me këtë gol të pranuar, Barcelona nisi të sulmojë më shumë duke rrezikuar disa herë me anë të Raphinhas dhe Lewandowskit, por që s’ia arritën.
Ishte mbrojtësi Sergi Roberto që u gjend në vendin e duhur për të shënuar nga një top i kthyer duke barazuar rezultatin në “Camp Nou”.
Pjesa e dytë ishte edhe më dramatike, me dy klubet spanjolle që tentonin t’i arkëtonin pikët e plota.
Barcelona fillimisht ishte më agresive duke pasur disa raste me anë të Lewandowskit, i cili provoi edhe një goditje gërshërë, por që nuk e finalizoi.
Real Madrid ktheu epërsinë përmes Marco Asensios, që shënoi nga afërsia pas një asistimi të Dani Carvajalit, por VAR-i e anuloi për pozitë jashtë loje (81′).
Kur madrilenët po sulmonin, Barcelona krijoi një kundërzbritje të shpejtë, me Ansu Fatin që asistoi për Franck Kessie i cili vulosi fitoren e vendasve (90+2’).
Kështu, falë kësaj fitore, Barcelona tani rrit distancën në kreun e La Ligas duke mbledhur 68 pikë, 12 më shumë se Real Madridi që ka 56 sosh në pozitën e dytë.
Në ndeshjen e parë pas pushimit ndërkombëtar, Barcelona do të jetë mysafir i Elches derisa Real Madridi do ta pret Valladolidin.
