Taulant Ferizi, avokati i drejtorit të Korporatës Energjetike të Kosovës (KEK), Nagip Krasniqit, po pretendon se atij i është përkeqësuar sërish gjendja shëndetësore.
I gjendur në mbajtje nga Policia e Kosovës, sipas avokatit, Krasniqit i është refuzuar kërkesa për dërgim në QKUK, transmeton gazeta online Reporteri.net.
Ai ka thënë se kjo po bëhet nën arsyetimin se Krasniqi ishte për trajtim në QKUK gjatë ditës.
“Z. Nagip Krasniqi aktualisht është në mbajtje pavarësisht se gjendja e tij shëndetësore është përkeqësuar sërish. Kërkesa e mbrojtjes për dërgim në QKUK është refuzuar me arsyetimin se i njëjti ka qëndruar sot njëherë gjatë ditës në QKUK për trajtim. Ne do të shfrytëzojmë të drejtën e ankesës ndaj këtij vendimi siç e parasheh ligji”, ka deklaruar Ferizi për Telegrafin.
Ferizi po ashtu ka thënë se nuk është thyer dera e banesës se klientit të tij, dhe se e njëjta është çelur bashkë me Policinë gjatë procedurave hetimore.
Me vendim të Prokurorisë Speciale, policia ka arrestuar të mërkurën Kryeshefin e KEK-ut, Nagip Krasniqi.
Sipas Prokurorisë, ai po dyshohet për veprat penale “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”.
