Avokatët kanë bërë me dije se Zyra e Rregullatorit për Energjinë (ZRrE) duhet t`i fillon procedurat për kompenzim e qytetarëve për 40 milionë eurot që janë shpenzuar në veri të vendit.
Ata kanë bërë me dije se nëse kjo nuk ndodh, atëherë qytetarët mund ta padisin këtë institucion në gjykatat vendore.
Avokati Yll Zekaj ka vlerësuar se pas vendimit të Gjykatës Supreme qytetarët e Kosovës e kanë këtë të drejtë.
“Tani më Gjykata Supreme e ka konfirmuar mirë se ky dëm shkon diku rreth 41 milionë euro, dëmi i shkaktuar pa të drejtë, apo pasurim i pabazë nga ana e KEDS-it në kurriz të qytetarëve, kështu që qytetarët tani më e kanë të drejtën të parashtrojnë padi individuale, për të realizuar këtë dëm, për të iu kompensuar paraja që i është marr pa të drejtë”, ka thënë Zekaj për “Dukagjinin”.
Të njëjten gjë e ka konfirmuar edhe Avokati i Popullit, Naim Qelaj.
“Vetë aktgjykimi i cili është vërtetuar me vendimin e Supremes e obligon Zyrën e Rregullatorit të energjisë, edhe autoritet tjera, që me i kthy mjete që i kanë ndal në emër të pagesave të energjisë, për komunat e veriut… Unë besoj se do implementohet është edhe detyrim, dhe obligim kushtetues i krejt autoriteteve që vendimet gjyqësore me i zbatu”, është shprehur ai.
