Haxhi Avdyli do ta mirëpriste një ndryshim në përbërjen e Qeverisë, ndoshta me shpresën që të bëhet vetë ministër. Por Astrit Gashi është i bindur se atë “nuk e pyet askush”.
Deputeti Haxhi Avdyli beson se nevojitet një riformatim në Qeveri. Anëtari i partisë Guxo, që duket se ka ambicie të fortë për t’u bërë ministër i Shëndetësisë, tha se do të ishte mirë që të ndodhte ndonjë ndryshim në kabinetin qeveritar.
“A do të ndodhë, nuk e di. A duhet të ndodhë, do të ishte mirë”, tha Avdyli të hënën në “Dpt Te Fidani”.
“Pse të mos ketë një riformatizim aty ku mungon energjia, në ndonjë sektor?”, pyeti Avdyli. Ai mori shembull ndërrimin e ndonjë ministri të ndonjë dikasteri, që sipas tij, nuk ka rezultate sa duhet.
“Unë e shoh shumë proces normal dhe pozitiv nëse bash është duke qarkulluar kjo ide”, tha deputeti.
Por analisti Astrit Gashi thotë se Haxhi Avdylin “nuk e pyet askush”.
“Sa i perket deklaratave të Haxhi Avdylit, përkundër respektit, ato fare nuk çojnë peshë. Nuk vendos asgjë ai, por as edhe Lista Guxo ku është ai. Nuk e pyet askush, me e thënë troç”, i tha Gashi Gazetës Express.
Avdyli tha mbrëmë se deri tani po e sheh se shëndetësia “nuk është prioritet” për Qeverinë.
“Pres angazhim edhe më shumë, edhe nga kryeministri, për Shëndetësinë”, tha ai.
Gashi megjithatë beson se problemet në shëndetësi nuk i faturohen ministrit aktual, Rifat Latifit. Sipas tij, Latifi “po ngulfatet” dhe Avdyli duhet të rrijë aty ku është.
“Ndonëse ambiciet e tij për ministër që deri më sot nuk janë realizuar janë legjitime, problemet në shëndetësi nuk janë si pasojë e keqmenaxhimit të ministrit Latifi, por zënies së frymës së tij nga disa vendime politike nga lartë në emërime e riemërime. Ministri Latifi në fakt është ndoshta ministri më kompetent që e ka kjo qeveri, por që po ngulfatet. Avdyli është neurokirurg dhe bën mirë të rrijë në profesionin e tij”, tha ai.
Formatizimi i Qeverisë, Gashi tha se “është duke u përmendur qe një kohë dhe atë nga vetë partia në pushtet”. Kjo, sipas tij po bëhet për dy arsye.
“E para, performanca e ulët e disa ministrave, dhe e dyta, nevoja e Qeverisë për t’u dukur se po bëhen ndryshime”, tha ai.
Gashi thotë se kjo nuk është asgjë e re. “Është një veprim taktik politik i Qeverive kur fillon të zë vend te votuesi pakënaqësia me performancën”.
