Zyra Kombëtare e Auditimit ka kryer auditim në ndërtimet e larta në Komunën e Prishtinës për vitin 2024/2025, komunë kjo e cila udhëhiqet nga arkitekti Përparim Rama. Një nga kritikat kryesore të Auditorit janë numri i certifikatave të përdorimit në raport me numrin e lejeve të lëshuara.
Siç thotë auditori, përgjatë viteve 2021-2023, raporti mes certifikatave dhe lejeve ishte një certifikatë për shtatë leje të lëshuara.
“Numri kaq i ulët i certifikatave të përdorimit, apo edhe ato ku kanë certifikata por që inspektimi final dhe vendimi për lëshim të certifikatës së përdorimit janë bërë vetëm si procese formale dhe pa ndonjë kontroll të detajuar, rrezikon që objektet e ndërtuara mos të jenë të sigurta për banim e as të cilësisë së duhur. Megjithatë, objektet e njëjta shiten dhe përdorën nga qytetarët për banim dhe afarizëm por që nuk mund t’i kenë me fleta poseduese rrjedhimisht blerësit mos të kenë siguri për pronat e tyre qoftë në aspektin e ndërtimi, qoftë në aspektin e të drejtës së pronës”, thuhet ndër të tjera në gjetjet e ZKA’së.
“Komuna e Prishtinës nuk kishte vendosur procedura të qarta dhe të standardizuara sa i përket procesit të ndërtimeve të larta, që nga procesi i lëshimit të lejeve të ndërtimit e deri tek pajisja me certifikatë të përdorimit. Ani pse disa procese janë funksionale ato nuk kanë siguruar çdo herë efikasitet as efektivitet në përmbylljen e këtij cikli. Për më tepër nuk kishte funksionalizuar as sistemin e-leja, e cila do t’i mundësonte efikasitet në proces dhe rrjedhimisht identifikimin e hallkave ku janë mangësitë më të mëdha”, thuhet në gjetjet e ZKA’së.
Sipas ZKA’së, numri i çerdheve, shkollave të ulëta dhe të mesme, Qendrave të Mjekësisë Familjare, transporti publik, etj, nuk ishte rritur në përputhje me rritjen e ndërtimeve të larta.
ZKA’ja thotë se mungesa e kontrolleve gjatë lëshimit të lejeve ndërtimore ka ndikuar që jo çdo kërkesë apo investitor të trajtohet njëjtë. Disa investitorëve iu është kërkuar rregullimi i parcelave, ndërrimi i destinimit të tokës, marrja e pëlqimeve nga Ndërmarrjet Publike përkatëse para se t’i lëshohet leja ndërtimore si dhe kohëzgjatja për trajnimin e kërkesës ishte tej zgjatur e në tri raste kërkesa edhe u i ishte refuzuar, ndërsa kishte investitor me po të njëjtat çështje por që lejet iu ishin dhënë pa ju kërkuar korrigjimin e tyre.
ZKA thotë se Komuna e Prishtinës ia ka lënë të gjitha inspektimet investitorëve, përveç atij final, duke mos qenë në përputhje projekti me lejën e lëshuar të ndërtimit. Pra, ka pasur devijime nga ndërtuesit, të cilat auditori i ka parë edhe me sy të lirë.
