Prishtina, një qytet që gjithmonë ka pasur zbukurime për festat e fundvitit, këtë vit mbeti pa dekorime për muajin e shenjtë të Ramazanit. Kjo mungesë ka shkaktuar reagime të shumta në rrjetet sociale, ku qytetarët kritikuan Kryetarin e Komunës së Prishtinës, Përparim Rama, për mosvendosjen e zbukurimeve, ashtu siç bëhet rregullisht për Krishtlindje dhe Vitin e Ri, por edhe për Ramazan viteve të fundit, shkruan Demorkacia.com.
Komentet në Facebook ishin të shumta dhe të larmishme, nga ata që akuzonin institucionet për mungesë barazie në festime, e deri tek ata që ironizonin me pretekstin se ndriçimi i xhamive dhe kandilët e ndezur ishin mjaftueshëm. “Për Krishtlindje dhe Vitin e Ri nuk kursehen, por për Ramazan, si duket, nuk paska fonde”, shkruante një komentues, ndërsa të tjerë tregonin se si në vite më parë Prishtina ishte stolisur me gjysmehëna, drita dhe dekorime që simbolizonin festën e myslimanëve.
Por, mungesa e dekorimeve mund të lidhet edhe me një problem më të thellë: pengesat në procesin e prokurimit. Një tender për dekorime verore, dimërore dhe për shënimin e datave me rëndësi ka ngecur në Organin Shqyrtues të Prokurimit (OSHP), pas konstatimit të shkeljeve ligjore.
Komuna shpalli fituesit e tenderit në dhjetorë, i cili parashihte edhe dekorimet për festat në verë, por me datën 06.01.2025, OE “AGRI BAU SH.P.K.” ka paraqitur një ankesë zyrtare kundër Autoritetit Kontraktues (AK) të Kuvendit të Komunës së Prishtinës. Ankesa vjen pas njoftimit të dhënies së kontratës për projektin “Ritender – DEKORIMET VERORE, DIMËRORE DHE SHËNIMI I DATAVE ME RËNDËSI”, i cili u rekomandua për kontratë OE “Te Fatosi” – Prishtinë.
Prokurimi, me nr. të identifikimit 616-24-8967-2-1-1, u realizua nëpër një procedurë të hapur me një vlerë të parashikuar prej 150,000 eurove. Megjithatë, eksperti i Organit Shqyrtues të Prokurimit (OSHP) ka gjetur disa shkelje në procesin e vlerësimit dhe ka rekomanduar rishqyrtimin e ofertës së OE “Te Fatosi”.
Gjatë shqyrtimit të pretendimeve të “AGRI BAU SH.P.K.”, eksperti shqyrtues ka konfirmuar disa pikëpyetje që lidhen me dokumentacionin e kërkuar dhe plotësimin e kritereve teknike nga operatori ekonomik fitues. Sipas raportit të ekspertit, disa dokumente dhe dëshmi teknike që u dorëzuan nuk përputhen plotësisht me kërkesat e specifikuara, duke lënë hapësirë për mosmarrëveshje dhe interpretim të gabuar të kushteve të tenderit.
Në lidhje me pretendimin e parë, eksperti shqyrtues ka konstatuar se OE “AGRI BAU SH.P.K.” ka dorëzuar dokumentacion të nevojshëm për përdorimin e mjeteve dhe pajisjeve teknike, megjithatë, AK duhet të sigurojë që gjatë fazës së sqarimeve të gjitha dokumentet të verifikohen në mënyrë objektive, duke respektuar dispozitat ligjore relevante.
Pretendimi i dytë lidhet me procedurën e rishqyrtimit të ofertës së OE “Te Fatosi” dhe reagimin e AK-së nëpër një seri vendimesh administrative, të cilat sipas ekspertit shqyrtues nuk kanë qenë gjithmonë të bazuar në argumente të qëndrueshme ligjore.
Ndërsa për pretendimin e tretë, lidhur me vërtetësinë e certifikatës ISO 9001:20215 të dorëzuar nga OE “Te Fatosi”, eksperti shqyrtues ka rekomanduar që AK të kthejë në rivlerësim këtë çështje dhe të sigurojë verifikimin e dokumentacionit teknik në mënyrë të pavarur dhe të sinqertë.
Në përfundim, eksperti shqyrtues ka propozuar që ankesa e OE “AGRI BAU SH.P.K.” të aprovohet si e bazuar, njoftimi për dhënie të kontratës të anulohet dhe që lënda të kthehet në rivlerësim për të siguruar një proces të drejtë dhe transparent të prokurimit publik.
Për të shqyrtuar vendimin e eksperti fjalën përfundimtare duhet ta jep Paneli i OSHP-së, i cili nuk ka marr vendim ende.
Ironikisht, vetëm një vit më parë, kryetari Përparim Rama ndante këto fjalë në një postim në Facebook, duke shoqëruar edhe me foto të zbukurimeve për Ramazan: “Në prag të Muajit të bekuar të Ramazanit, kemi dekoruar rrugën ‘Ibrahim Lutfiu’ në zonën e vjetër të kryeqytetit, për t’i dhënë atmosferë të ngrohtë dhe sjellë ndjesinë e festës e bashkimit Prishtinës tonë në këtë muaj sakrifice.
Vizituam po ashtu Këshillin e Bashkësisë Islame të Prishtinës, ku u pritëm nga kreu i KBI-së, Hetem ef. Sopjani me të cilin biseduam për projekte të përbashkëta në interes të qytetarëve.
Pamë edhe dizajnin e veçantë të lokalit ‘Begler’ i cili gjendet në këtë zonë dhe që duhet vizituar patjetër.
Ndërsa sonte ju pres te Xhamia e Gurit, në ora 20:30 bashkë me kryemiftiun e BIK, Naim Tërrnava, për të parë zonën e zbukuruar”.
Një vit më vonë, dritat janë fikur dhe bashkë me to edhe premtimet për një qytet të zbukuruar për të gjithë. /Demokracia.com/
