Trajneri i Arsenalit, Mikel Arteta mendon se ndryshimi i mentalitetit është një ndër arsyet kryesore të formës së lartë që po kalon mesfushori shqiptar Granit Xhaka.
30-vjeçari ka kaluar edicionin më të mirë të karrierës deri më tani duke shënuar shtatë gola dhe dhuruar pesë asistime në të gjitha garat.
Që kur Arteta mori drejtimin e Arsenalit, Xhaka ka pasur rol kyç duke qenë i pazëvendësueshëm. I pyetur për sekretin që ndikoi te Xhaka, tekniku spanjoll deklaroi:
“Mentaliteti. Ndjehet i aftë për ta bërë këtë, të kuptuarit se ku duhet të pozicionohet në momentet e duhura, të stërvitet çdo ditë. (Ai është) i gatshëm të përmirësojë dhe të mbështesë ekipin në fushat që ne ndjemë ishte e nevojshme që skuadra të bënte një hap tjetër përpara në mënyrën tonë të lojës”.
Kujtojmë, gjatë muajit mars edhe Xhaka e kishte konfirmuar për “beIN Sports” se Arteta është arsyeja pse vendosi të vazhdojë qëndrimin në “Emirates Stadium”.
“Ishte vetëm një njëri dhe emri i tij është Mikel Arteta. Gjithnjë do ta mbështes pavarësisht çfarë do që të ndodhë”.
“Pa të, jam i sigurt 100 për qind se nuk do të isha më në klub. Ai e di këtë, kam lidhje shumë të mirë dhe të sinqertë. Nuk ka rëndësi çfarë ndodhë në fushë, unë asnjëherë nuk do të jem kundër tij ose të them ndonjë gjë”.
“Ai e meriton respektin tim dhe të familjes gjithashtu. Kisha ikur, nuk doja ta veshja fanellën më. Tani jam krenar që e kam veshur sërish fanellën me shumë respekt dhe dashuri, shpresoj ta mbyllim këtë me trofe”, kishte deklaruar ai.
Arsenali momentalisht është tetë pikë para Manchester Cityt, që kanë një ndeshje më shumë të zhvilluar por i pret një përballje e vështirë ndaj Liverpoolit.
