Ministri i Punëve të Brendshme, Xhelal Sveçla, ka njoftuar se janë arrestuar tre zyrtarë të kësaj ministrie si dhe pronari dhe punëtori i një kompanie ndërtimi.
Sveçla, përmes një postimi në Facebook, tha se nga marrja e mandatit është zotuar për kuftim të krimit dhe korrupsionit.
“Si Qeveri dhe si Ministri, që nga marrja e mandatit jemi zotuar për luftë të pa kompromis ndaj krimit dhe korrupsionit e në veçanti ndaj këtyre fenomeneve të rrënjosura me vite të tëra brenda institucioneve tona. Kemi ofruar dhe dhënë mbështetjen e plotë ndaj organeve të rendit dhe kemi adresuar çdo keqpërdorim që kemi evidentuar që nga marrja e detyrës. Krimet ekonomike të Policisë së Kosovës kanë zhvilluar sot aksion në Ministrinë e Punëve Brendshme, saktësisht në Departamentin e Prokurimit. Me këtë rast, janë arrestuar tre zyrtarë të Ministrisë si dhe pronari së bashku me një punëtor të një kompanie ndërtimi, katër prej të cilëve sipas njoftimit zyrtar të Policisë janë ndaluar për 48 orë”, ka shkruar Sveçla në Facebook.
Ai shtoi se kushdo që vepron në kundërshtim me ligjin do të ballafaqohet me drejtësinë.
“Tashmë e kemi dëshmuar por ritheksoj se askush nuk do të jetë mbi ligjin. Kushdo që ka vepruar në çfarëdo forme në kundërshtim me ligjin, do të ballafaqohet me drejtësinë”, ka shtuar ai.
