Trupat amerikane të NATO-s u vendosën në rrugët kryesore në pjesën veriore të Kosovës të premten, teksa tensionet u rritën pas kolapsit të bisedimeve politike midis liderëve kosovarë e serbë në Bruksel
Kështu po raporton agjencia ndërkombëtare lajme Associated Press, teksa njoftojnë për mos-arritjen e ndonjë marrëveshjeje përgjatë takimit që patën të enjten në Bruksel.
Sipas mediumit, patrullat amerikane ishin vendosur përgjatë rrugëve kryesore që çojnë nga Serbia në Kosovë, drejt qytetit të Mitrovicës.
Siç vijon AP, shumë vendas kanë frikë se dështimi i këtyre bisedimeve politike që kishin për qëllim zgjidhjen e bllokimit 20 vjeçar ndërmjet Serbisë dhe Kosovës, mund të çojë në një formë të konfliktit lokal ndërmjet shqiptarëve dhe serbëve.
Josep Borrell, përfaqësuesi i lartë i BE-së për Punë të Jashtme, njoftoi pas takimit se “nuk u arrit asnjë marrëveshje” ndërmjet Kosovës dhe Serbisë.
Përgjatë së enjtes është raportuar me burime se Kurti dhe Vuçiq janë dakorduar që të bisedojnë një herë në muaj.
Kujtojmë se tensionet mes Serbisë dhe Kosovës u rritën në fund të muajit të kaluar kur qeveria Kurti deklaroi se dokumentet serbe të identitetit dhe targat e automjeteve nuk do të ishin më të vlefshme në territorin e Kosovës.
Serbia ka zbatuar të njëjtat masa për qytetarët e Kosovës që kalojnë në Serbi gjatë 10 viteve të fundit, duke thënë se nëse do të njihte targat dhe dokumentet e regjistrimit të Kosovës do të thoshte se e njeh Kosovën si shtet të pavarur.
