Njësia e Antidrogës në asistim të Njësisë së Reagimit të Shpejtë, kanë zhvilluar një aksion mëngjesin e sotëm në rrugën “Agush Gjoci” në Pejë, ku kanë kryer bastisje në një shtëpi, me ç’rast është sekuestruar drogë, armë, si dhe janë arrestuar vëlla e motër.
Burimet e Sinjalit brenda Prokurorisë kanë bërë me dije se Antidroga ka zbarkuar në shtëpinë e familjes Blakaj, ku janë kapur dy të dyshuarit, për posedim të substancave narkotike dhe armëmbajtje pa leje.
Sipas informacioneve të para që posedon Sinjali, gjatë kontrollit në shtëpinë e tyre janë gjetur një sasi e marihuanës, një armë, një grinder, që janë sekuestruar nga zyrtarët policorë, si dëshmi në lidhje me rastin.
Me t’u përfunduar aksioni, të dyshuarit janë shoqëruar në stacion policor, ku janë intervistuar nga hetuesit në lidhje me veprat me të cilat ngarkohen.
Ndaj tyre, Prokurori i Shtetit ka urdhëruar masën e ndalimit policor dhe inicimin e rasteve si “Posedimi i paautorizuar i narkotikëve, substancave psikotrope ose analoge” dhe “Mbajtja në pronësi, kontroll ose posedim të paautorizuar të armëve”.
