Drejtoria për Hetimin e Trafikimit me Narkotikë ka kryer një aksion kundër drogës sot në Prizren, ku janë kapur mbi 19 kilogramë substancë e dyshuar narkotike e llojit marihuanë, raporton Gazeta Sinjali.
Policia e Kosovës përmes një komunikate për media ka bërë me dije se Policia në koordinim me Prokurorinë kanë kryer bastisje në shtëpinë e të dyshuarit, pas mbledhjes së informacioneve se i njëjti posedon lëndë narkotike.
“Hetuesit policorë nga Drejtoria për Hetim e Trafikimit me Narkotik-Sektori Qendror, kanë trajtuar një informacion për posedim të lëndëve narkotike nga një i dyshuar. Kështu, pas hetimeve paraprake, kanë arritur ta identifikojnë të dyshuarin; A.Q., (viti i lindjes 1983, mashkull kosovar), kanë arritur ta lokalizojnë shtëpinë e tij dhe sot, më 21.12.2022, pas plotësimit të procedurave për kontroll nga organet e drejtësisë, në ora 12:27 është kontrolluar shtëpia e të dyshuarit. Gjatë kotrollit të shtëpisë së të dyshuarit në Prizren, policia ka arritur të gjejë dhe të konfiskojë 19 kg 546 gr substancë, dyshohet të jetë e llojit marihuanë”, thuhet në komunikatë.
I dyshuari është arrestuar dhe është shoqëruar në stacion policor për intervistim, ku me urdhër të prokurorit ndaj tij është iniciuar rasti ‘Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’.
Me vendim të prokurorit, 39-vjeçari është dërguar në mbajtje për 48 orë.
Sinjali do t’iu mbajë të informuar me detajet e reja.
