Ylli i Napolit, Amir Rrahmani është i lumtur me këtë formë fantastike që po e kalojnë në kampionatin italian.
Napoli shënoi një tjetër fitore të madhe duke mposhtur me rezultat 2:0 Atalantan, me kosovarin që shënoi golin e fitores me kokë.
Pas ndeshjes, Rrahmani u prononcua në “DAZN” duke deklaruar se janë duke luajtur mirë duke e vlerësuar si të vështirë sfidën ndaj Atalantas.
“Isha shumë mirë (në fillimin e sezonit), atëherë u lëndova, por për fat të mirë shokët e skuadrës bënë një punë të mirë. Ne po argëtohemi, po luajmë mirë, sot ishte e vështirë Atalanta është një ekip i madh, ne arritëm ta përfundojmë më së miri”.
Kosovari komentoi edhe titullin e mundshëm të Scudettos duke shtuar se janë me një mendim me tifozët dhe ka mundësi që të shpallen kampion.
“Ne jetojmë një realitet me fansat tanë, e ndjejmë dhe flasim për të“.
Në fund, Rrahmani foli edhe situatën e dy bashkëlojtarëve, mbrojtësit Kim dhe sulmuesit Osimhen.
“Kim? Ai ka një problem tek këmba që përsëritet, por shpresojmë se është një dëmtim i lehtë. Osimhen? Po të kisha qenë edhe unë sulmues, po të mos kisha shënuar, edhe unë do të isha nervoz, të gjithë sulmuesit duan të shënojnë“, përfundoi ai.
Me këtë formë fantastike, padyshim Rrahmani do të jetë ndihmë e madhe për mbrojtjen e Kosovës në kuadër të ndeshjeve kualifikuese për Kampionatin Evropian “Euro 2024”.
