Ambasadori i Shteteve të Bashkuara të Amerikës në Kosovë, Jeff Hovenier, nuk ka dashur t’i komentojë bisedat e shefes së Grupit Parlamentar të Lëvizjes Vetëvendosje, Mimoza Kusari – Lila me anëtarin e Listës Serbe, Sllavko Simiç dhe kriminelin Milan Radojiçiç.
Megjithatë i pyetur nga gazetarët rreth publikimit të disa përgjimeve ku e përfshirë është shefja e deputetëve të LVV-së, diplomati amerikan ka kujtuar se Radojiçiç është në listën e zezë të SHBA-ve.
“Nuk mund të flas shumë për këtë, liderët politikë në Parlament kanë komunikim me të gjithë palët. Por Radojiçiç ju e dini se është në listë të zezë të SHBA-ve”, tha ai.
I pyetur se a është Kosova afër zgjidhjes së situatës së tensionuar në Veri të vendit, meqë zëvendëskryeministri i parë i Kosovës, Besnik Bislimi, pas një takimi me të deleguarin e Bashkimit Evropian për dialogun, Miroslav Lajçak, tha se Kosova është pajtuar për de-përshkallëzimin e situatës në Veri, top-diplomati amerikan ka deklaruar se e ka të vështirë të thotë se janë afër arritjes së një zgjidhje për situatën në Veri.
Megjithatë ai ka ripërsëritur se de-eskalimi i situatës në Veri duhet të ndodh sa më shpejtë që të jetë e mundur.
