Sot gjatë pasditës, në Aeroportin e Prishtinës “Adem Jashari”, është raportuar për një alarm për bombë, sipas konfirmimit të Policisë së Kosovës. Megjithatë, pas kontrollit të kryer nga njësitë kompetente, ky alarm u zbulua se ishte i rremë.
Zëdhënësja e Policisë së Kosovës për rajonin e Prishtinës, Flora Ahmeti, konfirmoi këtë lajm për Gazetën Nacionale dhe tha se nuk është gjetur asgjë e dyshimtë pas këtyre kontrolleve.
Njësitet policore janë tërhequr nga ajo zonë, ndërkohë që hetuesit kanë filluar punën e tyre për të zbardhur të gjitha rrethanat që lidhen me këtë rast.
“Informata është trajtuar nga ana e policisë. Pas kontrolleve të kryera nga njësitet kompetente, nuk është gjetë asgjë e dyshimtë. Njësitet policore janë tërheq nga ajo zonë, ndërkohë që hetuesit kanë filluar punën për zbardhjen e të gjitha rrethanave që ndërlidhen me këtë rast.” – ka njoftuar Ahmeti.
