Në Prizren u mbajt protestë kundër Festivalit “DokuFest”, e thirrur nga imami i njërës prej xhamive të këtij qyteti, Besim Berisha, në këtë protestë raportohet se është sulmuar gazetari i Nacionales, Vullnet Krasniqi dhe kameramani i mediumit, shkruan Gazeta Metro.
Lidhur më sulmin ka reaguar edhe Asociacioni i Gazetarëve të Kosovës, duke dënuar sulmin ndaj ekipit të portalit Nacionale, gazetarit Vullnet Krasniqi dhe kameramanit, Arbër Latifi në Prizren.
AGK, në reagim ka thënë se sipas raportimeve të medies, ata janë sulmuar dhe shtyrë fizikisht nga një pjesë e turmës protestuese derisa po kryenin punën e tyre.
Reagimi i AGK’së:
AGK-ja e dënon sulmin fizik ndaj ekipit të Nacionales në Prizren
Asociacioni i Gazetarëve të Kosovës – AGK, është i tronditur me sulmin ndaj ekipit të portalit Nacionale, gazetarit Vullnet Krasniqi dhe kameramanit, Arbër Latifi në Prizren.
Krasniqi dhe Latifi ishin atje për të raportuar për protestën e thirur nga imamët lokalë kundër festivalit “Dokufest”.
Sipas raportimeve të medies, ata janë sulmuar dhe shtyrë fizikisht nga një pjesë e turmës protestuese derisa po kryenin punën e tyre.
Ky është një sulm i papranueshëm dhe kërcënim serioz për sigurinë e gazetarëve.
AGK-ja, kërkon nga Policia arrestimin e menjëhershëm të sulmuesve dhe përballjen e tyre të menjëhershme me drejtësinë.
#AGK #SafeJournalists #Nacionale.
