Ish-nënkryetari i LDK-së, Agim Veliu, ka hedhur kritika ndaj pasardhësve të tij në parti.
Për nënkryetarët e LDK-së, të cilët sot i dolën në mbrojtje kryetarit të LDK-së, Lumir Abdixhiku dhe udhëheqësisë së kësaj partie pas kërkesës së ish-kryeministrit Avdullah Hoti për ndryshim, Veliu pati fjalë goxha të rënda.
“Është për keqardhje të të detyrojnë, apo të vetëdetyrohesh për t’ia mbajtur ison shefit dhe të dalësh publikisht e ta mbrosh ‘liderin’ që po e dërgon në theqafje një familje të madhe politike, që për 35 vite ishte shembull i demokracisë dhe meritokracisë”, shkroi Veliu në Facebook.
Ai tha po ashtu: “Të jesh i pafuqishëm të ndryshosh gjendjen në shtëpinë politike, ku kryefamiljari (kryetari) të ka afruar formalisht ‘afër’ vetes, nuk është edhe shumë tragjike”.
Anëtari i Kryesisë së LDK-së, Hoti, sot përmes një postimi në Facebook, kërkoi ndryshim të lidershipit të partisë për shkak të rezultateve zgjedhore.
LDK-ja ka dalë partia e tretë në zgjedhjet e 9 shkurtit, prapa PDK-së (e dyta) dhe LVV-së (e para).
