Adil Behramaj, ish-këshilltar i ish-presidentit Hashim Thaçi, ka reaguar ndaj aksionit të fundit të Zyrës së Prokurorit të Specializuar, ku janë arrestuar disa persona, si dhe është bastisur edhe shtëpia e ish-ministrit Hajredin Kuçi.
Ai ka bërë me dije se ky aksion po zhvillohet një ditë pasi Hashim Thaçi u ngrit në këmbë kundër padrejtësisë në Hagë.
Në profilin e tij në “Facebook”, Behramaj ka shkruar se Prokuroria e Gjykatës Speciale është shndërruar në Ndërmarrje të Përbashkët Kriminale.
“Një ditë pasi Hashim Thaçi u ngrit në këmbë kundër padrejtësisë në Hagë, menjëherë në Prishtinë filloi arrestimet Zyra e Prokurorit të Specializuar. Ky është një persekutim klasik ndaj njerëzve që në formë direkte apo indirekte kanë lidhje me UÇK-në dhe krerët e saj në Hagë. Bashkim Smakaj është ish-ushtar i UÇK-së dhe një hero i heshtur i shtetit të Kosovës. Sot, Prokuroria e Gjykatës Speciale është shndërruar në Ndërmarrje të Përbashkët Kriminale dhe jo të arrestuarit e saj në Hagë!” shkroi ndër të tjera Behramaj.
