Lumir Abdixhiku, kryetar i Lidhjes Demokratike të Kosovës, ka reaguar pas kidnapimit të tre zyrtarëve policorë në veri nga njësitë speciale të Policisë së Serbisë.
Me anë të një postimi në Facebook, Abdixhiku e ka quajtur kidnapimin agresion luftënxitës të Serbisë dhe ka kërkuar bashkërendim dhe përafrim me aleatët perëndimorë.
“Të tre policët e rrëmbyer i presim në shtëpi. Ky është borxhi ynë si Republikë përballë agresionit luftënxitës të Serbisë. Lirimi i tyre i menjëhershëm është domosdoshmëri.
Për këtë lirim, bashkërendimi e përafrimi me aleatë është i paalternativë. Prandaj, sot, bie dhe perdja e naiviteti popullist që këtë bashkërendim e shihte si dobësi. Dobësi e vetme është thirrja e vonuar për ndihmë, pasi je poshtëruar”, ka shkruar Abdixhiku.
Tutje, i pari i LDK-së, ka kërkuar përgjegjësi nga kryeministri Albin Kurti dhe vartësit e tij.
“Kosova nuk e meriton një ditë të tillë.
Sot, kërkojmë përgjegjësi politike institucionale nga Kryemnistri dhe vartësi i tij. Ushtrimi i sovranitetit të vërtetë kërkon mençuri”, ka shkruar ai me tutje.
