Nicholas Abbot, ambasador i Mbretërisë së Bashkuar në Kosovë, ka deklaruar se është koha që Kosova të propozojë një draft-statut për Asociacionin e komunave me shumicë serbe, shkruan Gazeta Metro.
Ai ka shtuar se kjo duhet të bëhet në përputhje me kriteret e përcaktuar nga BE’ja.
‘‘Pra, tani është koha që Kosova të propozojë zyrtarisht një draft statut për një ASMM, duke u mbështetur në vizionin e vendosur nga Kryeministri javën e kaluar, në përputhje me kriteret e përcaktuara nga BE’’, ka thënë ai.
Po ashtu, ambasadori i Mbretërisë së Bashkuara ka theksuar edhe se, aleatët e Kosovës duan të shohin përparim në normalizimin e marrëdhënieve me Serbinë.
‘‘Kjo javë sheh shumë vizitorë të rëndësishëm në Prishtinë, duke përfshirë Drejtorin e Mbretërisë së Bashkuar për Ballkanin Perëndimor. Aleatët e Kosovës duan të shohin përparim në normalizimin e marrëdhënieve me Serbinë’’, ka deklaruar Abbot.
Përndryshe në takimin e fundit mes kryeministrit Albin Kurti dhe presidentit serb Aleksandar Vucic, të mbajtur me 2 maj, është prezantuar draft-statuti i Asociacionit të komunave me shumicë serbe,
Ky draft-statut, është hartuar nga Ekipi Menaxhues – i përbërë prej katër pjesëtarëve të komunitetit serb
Duhet shtuar se Kurti e refuzoi dokumentin, duke thënë se nuk është në përputhje me kushtetutshmërinë e Kosovës.
Ndërsa Vucic tha se është “shumë i shqetësuar”, sepse është e qartë se “Prishtina nuk dëshiron ta përmbushë obligimin e saj të dhjetë vjetëve më parë” për formimin e Asociacionit.
Lidhur me këtë, ministri i Administrimit të Pushtetit Lokal, Elbert Krasniqi, njoftoi më 3 maj se e ka liruar nga detyra ekipin menaxhues për draft-statutin e Asociacionit të Komunave me Shumicë serbe.
Sipas tij, ky ekip prezantoi punën e tij në Bruksel më 2 maj dhe se tashmë është pa status.
“Andaj, sot me datë 03 maj 2023, kam marr vendim për lirimin nga detyra të anëtarëve të këtij ekipi menaxhues, në përbërje të Danijela Vujičić, Jelena Bolovic, Igor Kalamar dhe Dejan Radojković”, kishte shkruar Krasniqi në Facebook.
Ekipi menaxhues ishte ngarkuar me përgjegjësinë e themelimit të Asociacionit, në kuadër të marrëveshjeve të Brukselit të vitit 2013 dhe 2015. /
