Aleanca për Ardhmërinë e Kosovës, e drejtuar prej Ramush Haradinajt, ka planifikuar diskutime të ndryshme pas “situatës së rëndë politike në Kosovë”.
Prandaj, AAK-ja njoftoi se në këto diskutime do të jenë prezentë pjesëmarrës nga jeta publike, ekspertë të fushave, përfaqësues të shoqërisë civile dhe mediave.
Diskutimi i AAK-së ku thuhet se pritet të gjenden modalitete të ndryshme për të dalë nga kjo situatë politike, nis nesër në ora 12:00 në Kuvendin e Kosovës.
“Grupi Parlamentar i Aleancës për Ardhmërinë e Kosovës, ka filluar një cikël diskutimesh për situatën e rëndë politike në Kosovë dhe modalitetet e mundshme për të dalë nga kjo situatë, me pjesëmarrës nga jeta publike, ekspertë të fushave, përfaqësues të shoqërisë civile dhe mediave”, thuhet në njoftimin e AAK-së.
“Kësaj here, do të mbahet tryezë diskutimi me përfaqësues të shoqërisë civile dhe të mediave, këtë të enjte, më datë 20 korrik, në ora 12:00, në sallën 506, në ndërtesën e Kuvendit të Republikës së Kosovës”.
