Nënkryetari i Listës Serbe, Dalibor Jevtiq, ka pretenduar se zgjedhjet në katër komuna në veri të Kosovës “janë në kundërshtim me demokracinë” dhe nuk kontribuojnë në qetësimin e tensioneve dhe ndërtimin e besimit.
“Përkundrazi, tani kemi një përpjekje për një proces zgjedhor në veri të Kosovës pa pjesëmarrjen e serbëve dhe një përpjekje për të sjellë në pushtet ata që përbëjnë dy për qind të popullsisë në zonat ku jeton 98 për qind e popullsisë serbe”, ka thënë Jevtiq për televizionin serbe “TV Përva”.
Ai ka pretenduar se “kjo është pikërisht pasqyrë e asaj që kryeministri i Kosovës Albin Kurti e quan demokraci” dhe “i qëllimit të tij përfundimtar – që të mos ketë serb në këtë zonë”, transmeton Paparaci.
I pyetur nëse pret ndonjë incident apo trazira të dielën gjatë zgjedhjeve, Jevtiq ka thënë se “do të bëjnë gjithçka për të ruajtur paqen dhe të mos reagojnë në asnjë mënyrë ndaj provokimeve të mundshme”.
“Sikur dikush me të vërtetë do të donte të shmang një situatë të tensionuar, do t’i shtynte këto zgjedhje, do të kishte ndërmarrë hapat që do të sigurojë paqe në përputhje me kërkesat e Listës Serbe dhe konkluzionet nga Rashkës, por këtu është shumë e qartë se, mbi të gjitha Albin Kurti nuk dëshiron ta qetësojë situatën”, ka pretenduar Jevtiq.
Zgjedhjet në Mitrovicën e Veriut, Zubin Potok, Leposaviq dhe Zveçan janë caktuar për të dielën, më 23 prill.
Serbët nga veriu i Kosovës, të cilët në nëntor u larguan nga institucionet e Kosovës, policia dhe gjyqësori, deklaruan se nuk do të marrin pjesë në këto zgjedhje për shkak se kushtet që ata i vendosën kur u larguan nga institucionet, pra tërheqja e policisë së Kosovës nga veriu i Kosovës dhe formimi i Asociacionit, nuk u plotësuan.
