140 puntorë teknik të shkollave në Prishtinë kanë hyrë në grevë që nga 6 prilli. Këtë vendim ata e morën për shkak të mungesës së kontratave të reja të punës.
Si pasojë e kësaj greve raportohet se disa shkolla janë zhytyr në papastërti.
Njoftimin për grevë e ka bërë Federata Sindikale e Punëtorëve Teknik të Sektorit Privat të Kosovës.
“
Punëtorët teknik nuk do të kryejnë shërbime për këto shkolla, se çka do të ndodhë me higjienën e shkollave, këtë më si miri e dinë nga Komuna e Prishtinës, e cila për ne është e papërgjegjshme në punën e tyre”, thuhet në njoftimin e tyre.
Tutje, në njoftimin e tyre ata kanë thënë se do të jenë komod edhe pse nga 1 prilli do të jenë pa paga, deri në zgjedhjen e operatorit të ri.
Lidhur me këtë çështje, kryetari i Sindikatës së Pavarur të Sektorit Privat, Jusuf Azemi ka thënë se punëtorët teknik nuk do të kryejnë shërbime përdersia nuk kanë kontrata.
Ndërkohë, ai bëri të ditur se gjendja higjienike në shkolla është jashtëzakonisht e tmerrshme.
“Kam biseduar dje me disa drejtorë për higjienën e shkollave, ku këta të fundit më kanë thënë se gjendja është jashtëzakonisht shumë e tmerrshme. Në 15-16 shkolla të Prishtinës nuk janë duke u kryer shërbime për mirëmbajtje”, ka thënë Azemi për Insajderin.
