Ministri i Bujqësisë Pylltarisë dhe Zhvillimit Rural, Faton Peci, vlerësoi që pas dakordimit në Bruskel dhe Ohër, pala serbe do ketë përpjekje për destabilizim në nivel të institucioneve në Kosovë.
Sipas ministrit Peci, këto përpjekje mund të vijnë si pasojë e pakënaqësisë së Serbisë, lidhur me zbatimin e planit franko-gjerman.
“Të gjitha obstruksionet në veri, por edhe orvatjet e tilla për të krijuar destabilitet institucional në Kosovë, janë në funksion të asaj që pas një dakordimi në Bruksel e Ohër, pala serbe po gjendet në një pozicion të palakmueshëm. Prandaj, tani e ka përpjekje të krijojë destabilizim ose të krijojë destabilitet në nivel të institucioneve në Kosovë. E kjo për shkak se nuk është e lehtë për Serbinë të pajtohen plotësisht për planin franko-gjerman. Të gjithë jemi koshient që një tip i tillë i dakordsimit, nuk është forma më e mirë, ose nuk është forma më e shkëlqyer që ne do e dëshironim. Megjithatë, nuk është një marrëveshje për tu hedhur poshtë, për shkak se në nënvete përmban disa atribute kryesore të shtetësisë”, deklaroi Peci në emisionin “Infonata”.
E sa i përket temës së Asociacionit, Peci tha se nga marrëveshja e dakorduar, nuk do dalë jashtë kornizave të Gjykatës Kushtetuese në Kosovë.
Ndërkaq, Peci demantoi se mund të ketë pasur krisje të marrëdhënieve mes tij dhe Lëvizjes Vetëvendosje, përcjell teve1info.
“Deri në këtë fazë nuk kemi pasur ndonjë problem serioz, në këtë rast me Lëvizjen Vetëvendosje. Përkundrazi, bashkëpunimi dhe koordinimi është tepër korrekt, nuk ka ndonjë rast në të cilin do e quanim mospajtim ose përplasje”, tregoi tutje Peci në Tëvë1.
Derisa deklaroi që të gjitha ndryshimet që i ka pësuar Vetëvendosje nga mënyra e sjelljes dhe veprimit në opozitë dhe tani në nivel të sjelljes institucionale, janë në interes të Kosovës.
